Парлумони Словакия 26 сентябр ба Конститутсияи ин кишвар тағйирот ворид кард. Тибқи ин тағйрот танҳо ду ҷинс — мард ва зан эътироф мешавад.
Илова бар ин, тағйирот манъи фарзандхонӣ аз ҷониби ҷуфтҳое, ки расман ақди никоҳ надоранд, ва пурра манъи модарии суррогатро пешбинӣ мекунад.
Ҳадафи ин тағйирот, ки бо пешниҳоди сарвазири ин кишвар Роберт Фитсо ворид шудаанд, «таҳкими арзишҳои суннатӣ ва ҳифзи мероси фарҳангии Словакия» гуфта мешавад. Вазири адлияи ин кишвар Борис Суско изҳор доштааст, ки ин арзишҳо аз Конститутсия бармеоянд ва ба шинохти издивоҷ ҳамчун иттиҳоди вижаи мард ва зан вобастаанд.
Дар санад ҳамчунин ба соҳибихтиёрии Словакия дар масоили арзишҳо, ахлоқ ва фарҳанг ишора шудааст ва зарурати баробарии занону мардон дар пардохти музди меҳнат сабт гардид. Тағйирот аз 1 ноябр ба иҷро медароянд.
Аз 150 вакили парлумон, 90 нафар ба ҷонибдории тағйирот овоз доданд. Ҳизби ҳоким раъйи кофӣ надошт, аммо якчанд вакилони муҳофизакори мухолифон низ тағйиротро дастгирӣ карданд.
Аммо ин тағйирот аз ҷониби Комиссияи Венетсия назди Шӯрои Аврупо интиқод шудааст.
