Мактаби №19-и деҳаи Ускроғи (Вскроғи) ноҳияи Ванҷ соҳиби майдон шуд. Майдон бо тӯли 42 ва паҳнои 22 метр бунёд гардидааст.
Майдони қаблии мактаб ноҳамвор буд ва зимни бозиҳои футболу волейбол туб ба ҷарӣ ва ҳатто ба дарё мерафт. Замини майдони нав ҳамвор, атрофаш маҳкам ва чароғҳои равшандиҳанда дар он насб шудаанд. Дар вақти дарс хонандагон аз ин майдон истифода мекунанд ва баъд аз дарс барои ҳамаи ҷавонони деҳа макони тамрин хоҳад буд.
Дар арафаи ҷашни Истиқлол, имрӯз, 6 сентябр бо иштироки раиси ноҳияи Ванҷ, намояндагони Мақомоти иҷроияи ҳокимияти давлатии Вилояти Мухтори Куҳистони Бадахшон майдон мавриди баҳрабардорӣ қарор гирифт.
Барои бунёди майдон муҳоҷирон, соҳибкорон ва дигар ашхоси хайрхоҳи деҳа маблағ ҷамъоварӣ кардаанд. Корҳои сохтмонӣ тариқи ҳашар аз ҷониби сокинони деҳа анҷом шуд.
