Павел Дуров дар бораи тарҳи қаллобӣ тариқи тӯҳфаҳо дар Telegram гуфт. Поягузори паёмрасони Telegram Павел Дуров дар канали шахсиаш корбаронро дар бораи тарҳҳои қаллобӣ бо тӯҳфаҳо ва номҳои корбарӣ (юзернеймҳо) ҳушдор дод.
Ба гуфтаи ӯ, тӯҳфаҳои нодир, рақамҳо ва номҳои корбарӣ, ки қаблан бо чанд доллар харида мешуданд, ҳоло метавонанд бо нархи зиёда аз 100 ҳазор доллар фурӯхта шаванд.
«Мо мебинем, ки қаллобон бо таҳдид ва шантаж корбаронро маҷбур мекунанд, ки ин ашёи коллексионии арзишмандро бидиҳанд. Ҳамчунин гузоришҳо дар бораи каналҳое ҳастанд, ки бо фишор ва таҳдид ба фош кардани маълумоти шахсӣ ё махфӣ, пул талаб мекунанд.», — гуфтааст Дуров.
Ӯ таъкид кардааст, ки баъзе қаллобон ин схемаро ба як модели доимии «бизнес» табдил додаанд — онҳо паёмҳои шармоварро нашр мекунанд ва барои пок кардани он пул мегиранд. Дуров афзуд, ки чунин амалҳо ғайриахлоқӣ ва ғайриқонунӣ ҳастанд.
Дар паёми худ ӯ корбаронро ташвиқ кард, ки дар бораи чунин ҳолатҳо гузориш диҳанд.
