Зоҳран Мамданӣ, ки дар интихоботи муқаддамотии демократҳои Ню-Йорк пирӯз шуд, эҳтимоли хеле зиёд номзади навбатии шаҳрдори ин мегаполис мегардад.
BBC менависад, ки ин хабар дар Амрико ҳам норозигӣ, ҳам ҳайрат, ҳам тарс ва ҳам овозаҳои зиёдро ба вуҷуд овардааст, масъала на танҳо дар асли насаби ӯст, балки дар сиёсати он аст, ки Мамдании 33-сола таблиғ мекунад. Ӯ дар Уганда таваллуд шудааст, пайрави ислом аст, барои синфи миёна имтиёзҳо ваъда медиҳад ва ҷонибдори Фаластин мебошад.
Зохран Мамдании 33-сола дар Уганда дар оилаи зиёӣ таваллуд шудааст, падараш профессор ва модараш коргардон аст. Падару модараш насабҳои ҳиндӣ, угандӣ ва амрикоӣ доранд, худи Мамданӣ мусалмон аст.
Мамданӣ соли 2020 дар интихоботи муқаддамотии Ҳизби демократӣ пирӯз шуда, дар Ассамблеяи иёлати Ню-Йорк соҳиб курсӣ шуд. Бузургтарин дастоварди ӯ оғоз кардани барномаи озмоишии автобусҳои ройгон дар Ню-Йорк дар соли 2024 мебошад.
Мамданӣ бо ҳамин барнома маъракаи интихоботии худро барои шаҳрдорӣ оғоз намуд. Аз ҷумлаи пешниҳодҳои асосии ӯ инҳоянд: тавсеаи нақлиёти ҷамъиятии ройгон, боло бурдани музди меҳнати ҳадди ақал аз 16 то 30 доллар дар як соат, дастгирии оилаҳои дорои кӯдакон ва таъсиси шабакаи шаҳрии мағозаҳои маҳсулоти арзон. Аммо он чизе, ки бештар рақибонашро ба хашм овард, нақшаи Мамданӣ аст, ки андозҳоро барои ширкатҳо ва шахсоне, ки дар як сол зиёда аз як миллион доллар даромад доранд, боло барад, инчунин афзоиши иҷораи манзилро барои як қисми манзилҳо мутаваққиф созад то дастрасии хонаҳои иҷораро дар шаҳр беҳтар кунад.
