Дар изҳороти дафтари нахуствазири Исроил, Бинямин Нетаняҳу гуфта мешавад, ки тағйироте, ки ҲАМОС пешниҳод кардааст, барои Исроил қобили қабул нест.
Тағйироте, ки ҲАМОС ба пешниҳоди Қатар оид ба танзими вазъият дар Ғазза ворид кардааст, барои Исроил қобили қабул нест, гуфтааст дафтари Бинямин Нетаняҳу. Бо вуҷуди ин, нахуствазири Исроил эълон кардааст, ки ҳайатеро барои музокироти ғайримустақим бо ҲАМОС ба Қатар мефиристад.
Маҳз кадом тағйиротҳоро Исроил қобили қабул намедонад, гуфта намешавад. Нашрияи Times of Israel рӯзи шанбе бо истинод ба манобеъ хабар додааст, ки ҲАМОС исрор меварзад, ки ба созиш банде ворид карда шавад, ки дар он гуфта мешавад музокирот оид ба қатъии ниҳоии ҷанг идома хоҳад ёфт ва инчунин талаб дорад, ки артиши Исроил ба мавқеъҳое баргардад, ки то лаҳзаи анҷоми оташбаси қаблӣ ишғол карда буд.
Дар ҳамин ҳол, шоми рӯзи шанбе дар Исроил намоишҳои чандҳазорнафарӣ баргузор шуданд, ки иштирокчиёнашон хостори қатъи ҷанг дар Ғазза ва раҳоии гаравгонҳое буданд, ки то ҳол дар асорати ҲАМОС қарор доранд. Ба иттилои ҷониби Исроил, аз 50 гаравгоне, ки то ҳол дар Ғазза нигоҳ дошта мешаванд, 20 нафарашон зиндаанд, 28 нафар кушта шудаанд ва тақдири ду нафари дигар номаълум аст.
