Думаи давлатӣ ҷаримаҳоро барои «агентҳои хориҷӣ» то ним миллион рубл боло бурд.
Думаи давлатии Русия тағйиротеро пазируфт, ки дар сурати иҷро накардани талаботи Вазорати адлияи Русия барои нишонгузории нодуруст ё набудани тамғаи «агенти хориҷӣ» дар маводи нашршуда ҷарима то 500 ҳазор рубл муқаррар мешавад. Ин муқаррарот ба Кодекси ҳуқуқвайронкуниҳои маъмурӣ илова гардид.
Василий Пискарёв, вакили Дума аз ҳизби «Русияи воҳид» гуфтааст, наздик ба 40 дарсади агентҳои хориҷӣ аллакай Русияро тарк кардаанд, аммо бо ин тағйирот имкон пайдо мешавад, ки аз суратҳисобҳои махсуси онҳо ҷарима ситонида шавад. Ин суратҳисобҳоро агентҳо барои гирифтани ҳаққи муаллиф ва пардохтҳои дигар бояд боз кунанд.
Соли 2022 дар Русия лоиҳаи қонуни нав дар бораи «агентҳои хориҷӣ» — «Дар бораи назорат аз болои фаъолияти шахсони таҳти таъсири хориҷӣ» таҳия шуда буд. Тибқи ин қонун «агенти хориҷӣ» шахсоне эътироф мешаванд, ки аз хориҷа дастгирӣ мегиранд ё таҳти таъсири хориҷӣ дар шаклҳои дигар қарор доранд.
Сомонаҳои «агентҳои хориҷӣ»-ро бо дархости Вазорати адлияи Русия дар сурати ошкор шудани қонуншиканӣ, аз ҷумла дар сурати мавҷуд набудани аломатгузорӣ мебанданд.
