BMW эълон кард, ки дар нимаи дуюми соли 2025 дар бозори Чин зеҳни сунъии DeepSeek-ро дар мошинҳои худ ҷорӣ мекунад. Дар ин бора роҳбари консерни автомобилии BMW Оливер Сипсе дар намоишгоҳи автомобилии Шанхай хабар додааст.
Ба гуфтаи Сипсе, Чин дар соҳаи зеҳни сунъӣ, бахусус дар соҳаи автомобилсозӣ, мавқеи пешсафро ишғол мекунад. Дар доираи стратегияи рушди қарорҳои рақамӣ, BMW ният дорад, ки имкониятҳои функсионалии мошинҳо, аз ҷумла ёвари зеҳни сунъӣ, идоракунии овозӣ ва хадамоти фардиро тақвият бахшад.
Ин дар ҳолест, ки як қатор кишварҳои аврупоӣ дар идораҳои давлатӣ истифодаи DeepSeek-и чиниро манъ кардаанд.
Ахиран Hyundai Motor Group ба шумораи афзояндаи ширкатҳо ва ташкилотҳои давлатӣ дар Кореяи Ҷанубӣ ҳамроҳ шуд, ки ба кормандони худ истифодаи чат-боти дорои зеҳни сунъии чинии DeepSeek-ро манъ карданд.
