Тибқи талаботи лоиҳаи қонуни воридшуда ба Думаи давлатии Русия, муҳоҷироне, ки барои гирифтани патент муроҷиат мекунанд, вазифадоранд аз қайди геномӣ гузаранд.
Дар сурати қабули қонун, маблағи ин навъи муоинаи тиббӣ аз ҳисоби муҳоҷирон пардохт мегардад.
Муаллифон (вакилони вилояти Ленинград) қайд карданд, ки шаҳрвандони хориҷие, ки аз Русия ихроҷ шудаанд, аксар вақт кӯшиш мекунанд, ки дубора бо ҳуҷҷатҳои қалбакӣ ё шахси дигар ба кишвар ворид шаванд. Ба ақидаи онҳо, бақайдгирии геномӣ имкон медиҳад, ки ҳатто ҳангоми тағир додани маълумоти шахсӣ, муҳоҷирон ба таври дақиқ муайян карда шаванд.
Илова бар ин, навоварӣ барои баланд бардоштани ошкорсозии ҷиноятҳои солҳои пешин мусоидат хоҳад кард, зеро бисёре аз парвандаҳои ҷиноӣ бинобар набудани маълумоти боэътимод дар бораи шахсияти гумонбарҳо кушода нашудаанд. Ташкили пойгоҳи додаҳои генетикӣ ба кормандони мақомоти ҳифзи ҳуқуқ имкон медиҳад, ки зуд ширкаткунандагонро муайян кунанд, бахусус агар ҷинояткороне, ки аз Русия фирор кардаанд, кӯшиш кунанд, ки баргарданд.
Тибқи қонунгузории амалкунанда, муҳоҷирони меҳнатӣ вазифадоранд аз муоинаи тиббӣ гузаранд ва муаллифони ташаббус пешниҳод мекунанд, ки онро бо супоридани маводи биологӣ барои бақайдгирии ҳатмии давлатии геномӣ пурра намоянд. Ҳамаи хароҷотро худи шаҳрванди хориҷӣ пардохт кунанд.
