Дар доираи иқдоми башардӯстона якчанд давлати узви Созмони исломии амнияти озуқаворӣ, аз ҷумла, Тоҷикистон, Қазоқистон, Озарбойҷон ва Бангладеш ба мардуми Ғазза, ки ба мушкилоти шадиди норасоии ғизо рӯ ба рӯ ҳасанд, 200 тонна орд фиристода шудааст.
«Интизор меравад, ки корвони кумаки башардӯстона давоми 2 рӯз ба гузаргоҳи сарҳадии Керем Шалом/Карам Абу Салем мерасад ва дар ҳамоҳангӣ бо Барномаи ҷаҳонии озуқаи СММ (WFP) ва дигар ниҳодҳои Созмони Милал ҷиҳати интиқоли бехатари кӯмакҳо, тақрибан ба 8 ҳазор хонавода дар таъмини камбудии ғизо мусоидат хоҳад кард.»,- омадааст дар хабари Вазорати корҳои хориҷии Тоҷикистон.
15-уми январ (баъд аз 467 рӯз ҷанги байни Исроил ва гурӯҳи фаластинии «Ҳамос») ҳар ду тараф бо созиши оташбас дар Ғазза ва озодии гаравгонҳо мувофиқат карданд.
Ҷанг миёни Исроил ва гурӯҳи тундрави «Ҳамос» рӯзи 7-уми октябри соли 2023 оғоз шуд. Пас аз ҳамлаи «Ҳамос», ки 1200 исроилиро кушт ва 250 касро гаравгон гирифт, Исроил ба Ғазза юриш бурд.
Ба гуфтаи мақомоти Ғазза, дар ин ҷанг беш аз 46 ҳазор кас кушта ва 90 дарсади аҳолии ин минтақа овора шудаанд. Аксар кушташудаҳои ҷониби фаластинӣ занон ва кӯдакон мебошанд.
