Дар Чин нархи iPhone дар пасманзари ҷорӣ шудани субсидияҳо барои хариди электроника поин рафт.
Барномаи давлатии субсидияи электроника, ки 20 январи соли 2025 дар Чин эътибор пайдо кард, аллакай боиси паст шудани нархи смартфонҳо, аз ҷумла моделҳои iPhone шуд. Дар ин бора нашрияи GizmoChina хабар медиҳад.
Ҳукумати Чин ба маҳсулоти арзишашон то 6000 юан (тақрибан 820 доллар) ба андозаи 15% нархи мол тахфиф пешниҳод мекунад. Маблағи ҳадди аксари субсидия 500 юан (тақрибан 68 доллар) барои як молро ташкил медиҳад. Субсидия якдафъаина аст.
Дар интизории оғози барнома, фурӯшандагони смартфонҳо нархҳоро дар Чин ислоҳ карданд. Ҳамин тавр, нархи iPhone 16 Plus аз 6999 юан (956 доллар) то 5999 юан (820 доллар) коҳиш ёф. iPhone 16 дар платформаҳо ба мисли JD.com тақрибан 4999 юан (683 доллар) фурӯхта мешавад ва пас аз субсидия нархи он тақрибан 4499 юан (615 доллар)-ро ташкил хоҳад дод.
Ширкати Xiaomi низ фаъолона аз имкониятҳои барномаи нав истифода мебарад. Пас аз субсидия, моделҳои флагмани Redmi Turbo 4 ва K80 ҳоло аз 1699 юан (232 доллар) дастрасанд.
Интизор меравад, ки барномаи субсидия дар Чин истеъмолкунандагонро ҳавасманд созад, фурӯши электроникаи рақамиро афзоиш диҳад ва имкониятҳои навро барои рушди тамоми соҳа, аз ҷумла таъминкунандагони қисмҳои эҳтиётӣ фароҳам оварад.
