Имрӯз, 1 октябр дар шаҳри Душанбе маросими даъвати тирамоҳии ҷавонон ба хизмати ҳарбӣ таҳти унвони “Рӯзи даъватшаванда” баргузор гардид.
Ёдовар мешавем, ки даъвату гусели шаҳрвандон ба сафи Қувваҳои Мусаллаҳи мамлакат, дар асоси Фармони Президенти Ҷумҳурии Тоҷикистон Эмомалӣ Раҳмон аз 27-уми августи соли 2024 таҳти №856 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006-и Ҷумҳурии Тоҷикистон ба хизмати ҳарбӣ” ташкилу ба роҳ монда шудааст.
Ба иттилои Вазорати мудофиаи кишвар айни ҳол дар тамоми комиссариатҳои ҳарбии вилоятҳо ва шаҳру ноҳияҳои мамлакат аз ҳисоби масъулини бахшу шуъбаҳои вобастаи мақомоти иҷроияи ҳокимияти давлатӣ, комиссияҳои давлатии даъват таъсис дода шудаанд, ки аъзоёни вобасташудаи ин маъракаи муҳими сиёсӣ давоми моҳҳои октябр ва ноябри соли равон даъвату гусели шаҳрвандонро ба хизмати ҳатмии ҳарбӣ дар сатҳи лозима ташкилу баргузор менамоянд.
Зеро, бо мақсади амалӣ намудани муқаррароти моддаи 34-и Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» раисони шаҳру ноҳияҳо якҷо бо комиссариатҳои ҳарбӣ тибқи банди 5-уми фармони болозикр муваззаф шудаанд, ки даъвати муташаккилонаи шаҳрвандонро ба хизмати ҳарбӣ бо дарки масъулият ба роҳ монанд.
Ҳамасола дар Ҷумҳурии Тоҷикистон шаҳрвандони ҷинси марди аз 18 то 27-сола дар ду мавсим, аз ҷумла дар давоми моҳҳои апрел-май ва октябр-ноябр ба хизмати ҳатмии ҳарбӣ даъват карда мешаванд.
