Шаш корхонаи коркарди хушкмева аз Тоҷикистон, бозигарони калидии бозори хушкмева дар Осиёи Марказӣ, дар намоишгоҳи мӯътабари “Gulfood”, ки рӯзҳои 19-23-юми феврали соли 2024 дар шаҳри Дубай баргузор мегардад, иштирок мекунанд. Аз ҷумла, корхонаҳои шаҳри Исфара: “Баракат Исфара”, “Оро Исфара”, “Исфара Фуд”, “Субҳи ватан”, “Висол”, ҳамчунин, “Насим” аз Хоруғ, ва Ассотсиатсияи байналмилалии истеҳсолкунандагон ва содироткунандагони маҳсулоти кишоварзии Тоҷикистон.
Ин сафар ва иштироки корхонаҳои Тоҷикистон дар намоишгоҳ дар чаҳорчӯбаи лоиҳаи Маркази тиҷорати байналмилалӣ (МТБ) – “Пешбурди тиҷорат дар Шарқ: Кишварҳои Балкан ва Осиёи Марказӣ” (TPE), ки маблағгузораш Ҳукумати Швейтсария мебошад, баргузор мешавад. Иштироки ҳайати Тоҷикистон дар намоишгоҳ ва сафари мазкурро ширкатҳои машваратии “ACT Development” (Душанбе) ва “Business Consulting Group” (Хуҷанд), шарикони маҳаллии лоиҳаи МТБ танзим карданд ва ҳайатро дар намоишгоҳ роҳбаладӣ мекунанд.
Намоишгоҳ барои корхонаҳои коркарди хушкмеваи тоҷик имкони хубе фароҳам меорад, то маҳсулот ва имкониятҳои худро муаррифӣ ва тарғиб намоянд, ҳамкориҳои эҳтимолии тиҷоратиро баррасӣ карда, бо раванд ва тамоюлоти нави бозор дар минтақа шинос шаванд.
Gulfood Dubai ҳамасола баргузор шуда, яке аз намоишгоҳҳои бузургтарини тиҷоратӣ дар саноати хӯрокворӣ мебошад. Намоишгоҳ барои 29-умин бор ширкаткунандагон, коршиносони пешсфи соҳа ва харидоронро аз саросари ҷаҳон ҷиҳати табодули идеяҳо, тавсеаи равобити тиҷоратӣ ва барқарор намудани ҳамкориҳои стратегӣ гирди ҳам меорад.
Ширкати корхонаҳои Тоҷикистон дар намоишгоҳ дар чаҳорчӯбаи лоиҳаи Маркази тиҷорати байналмилалӣ амалӣ мегардад.
Акс аз шабакаи интернет
