Паҳлавонони шинохтаи тоҷик Беҳрӯзи Хоҷазода ва Темур Раҳимов дар мусобиқоти ҷаҳонии устодони ҷудо «Hungary Masters-2023”, ки рӯзҳои 4-6-уми август дар пойтахти шаҳри Будапешти Маҷористон баргузор шуд, медалҳои нуқра ба даст оварданд.
Беҳрӯзи Хоҷазода дар вазни то 73 кг баъди се пирӯзӣ бар Мануэл Ломбардо (Италия), Даниел Сзегеди (Маҷористон) ва қаҳрамони феълии ҷаҳон Нилс Стамп (Швейтсария) ба даври ниманиҳоӣ роҳ ёфт. Ӯ дар нимфинал паҳлавони ҷавони гурҷӣ Георги Терашвилиро шикаст дода, ба даври ниҳоӣ роҳ ёфт.
Беҳрӯз шоми шанбе, 5-уми август, барои медали тилло аз Соичи Ҳашимото, барандаи медали биринҷии қаҳрамонии ҷаҳон-2023 дар Доҳаи Қатар, мағлуб гашт ва бори аввал дар ин мусобиқоти пурнуфуз соҳиби медали нуқра, 4 ҳазор евро ва дар радабандии ҷаҳонӣ соҳиби 1260 имтиёз гардид.
Темур Раҳимов рӯзи 6-уми август дар вазни беш аз 100 кило рақобатро аз даври дувум оғоз карда, бар Ҷелле Сниппеи ҳолландӣ дастболо шуд. Вай дар даври чаҳорякниҳоӣ бар Ҷайегу Юн аз Кореяи Ҷанубӣ ғолиб омад.
Паҳлавони номдори тоҷик дар даври ниманиҳоӣ бар рақиби ботаҷрибаи ҷопониаш Кокоро Кагуера ғалаба карда, ба финал баромад. Вале Темур дар даври ниҳоӣ аз Мартти Пуумалайнен (Финляндия) шикаст хӯрд. Дарвоқеъ, аз пеш Раҳимов се маротиба дар мусобиқоти мухталиф Пуумалайненро шикаст дода буд. Раҳимов бо медали нуқра, 4 ҳазор евро ва 1260 имтиёз қадрдонӣ шуд.
Акс аз интернет
