Соҳибкории иҷтимоӣ тиҷоратест, ки ҳадаф аз таъсиси он рисолати иҷтимоӣ ва хайрхоҳона мебошад.
Бо соҳибкории иҷтимоӣ метавон даромад гирифт ва ба дигарон бо фароҳам овардани ҷойи корӣ кумак кард, мушкилоти иҷтимоиро рафъ намуд. Яъне, масъулияти иҷтимоӣ барои ин гуна соҳибкорӣ муҳимтар аст.
Масалан, як нафарро ифлосии маҳаллаш нороҳат мекунад. Ӯ мехоҳад, ки барои рафъи мушкилӣ корхонаи коркарди партов бунёд намуда, партовҳоро ҷамъоварӣ ва коркард намояд. Барои ин, аз ҳисоби гуруҳи осебпазир, аз қабили бекорон, маъюбон, модарони танҳо, ятимон корманд ҷалб карда, бо онҳо музди меҳнат таъин менамояд. Аз ин ҳисоб мушкили экологӣ ҳал, маҳал тоза ва чандин нафар бо ҷойи кор таъмин мегардад.
Бунёди мактаб, беморхона ва амсоли инҳо низ метавонад соҳибкории иҷтимоӣ бошад, ки мушкили ҷомеа ҳал мегардад…
Дар тиҷорати анъанавӣ муваффақиятро аз рӯи ҳиссаи бозор ё афзоиши даромади солона чен мекунанд. Дар соҳибкории иҷтимоӣ ченакҳо метавонанд дигар бошанд, ба монандаи ҷойҳои кории эҷодшуда, ки мушкилоти ҷомеа то ҳадде ҳал мегардад ва ҳар як мушкилоти иҷтимоӣ метавонад нуқтаи ибтидоии тиҷорати нав бошад.
Иқтисодшинос Уктам Ҷумаев низ мегӯяд, соҳибкории иҷтимоӣ ҳалли мушкилоти иҷтимоии ҷомеа ва шуғлофарист.
«Хусусияти асосии соҳибкории иҷтимоӣ дар он дида мешавад, ки соҳибкории иҷтимоӣ барои мусоидат ба шуғл, ташкили истеҳсолот ва савдои маҷмӯи молу хизматрасониҳое, ки аз ҷониби гуруҳҳои осебпазири аҳолӣ истеҳсол шудааст, равона мегардад. Тафовути соҳибкории иҷтимоӣ аз соҳибкории анъанавӣ дар он аст, ки соҳибкории иҷтимоӣ дар раванди истеҳсолот, ҷалб, шуғл ва ҳамгироии иқтисодӣ табақаҳои осебпазирро муайян менамояд. Шароити асосии фаъолияти иқтисодии он аз фаъолияти табақаҳои осебпазир вобастагии калон дорад ва ба ҳалли мушкилоти асосии он нигаронида шудааст.»
Маълумоти бештар дар эксплейнери навбатии мо: