Бори аввал дар Тоҷикистон ҷароҳиии кӯдакони якҷоя таваллудшуда ва ё ба истилоҳи тиббӣ “дугоникҳои сиамӣ” гузаронида шуд. Ҷароҳии мазкурро Шоҳин Раҳмонови 36-сола анҷом дод.
Таваллуд тариқи буриши қайсарӣ гузаронида шуд. Яке аз навзодон (ҷинсаш писар) фавтида буд, ҳолати навзоди дигар (ҷинсаш духтар) хуб аст.
Шоҳин Раҳмонов зодаи ноҳияи Варзоб буда, соли 2009 Донишгоҳи Давлатии Тиббии Тоҷикистон ба номи Абӯалӣ ибни Синоро хатм намуда, соли 2014 давраи аспирантураро бо ихтисоси «ҷарроҳи кӯдакон» дар донишгоҳи мазкур ба поён расонд. Ӯ дар мавзӯи «Ташхис ва табобати апендисити шадид бо усули эндовидеочарроҳӣ дар кӯдакон» рисолаи номзадӣ ҳимоя карда, номзади илмҳои тиб гардид.
Ҳамзамон ӯ курси такмили ихтисоси эндочаррозии кӯдаконаро дар СЗГМУ ба номи Мечников, шаҳри Санкт-Петербурги Федератсияи Русия гузаштааст. Пас аз иҷрои вазифаҳои гуногун соли 2015 ба вазифаи мудири шуъбаи ҷарроҳии навзодон ва кӯдакони сину соли ширмак дар Муассисаи давлатии “Маркази миллии тиббии Тоҷикистон “Шифобахш” таъин гардид. Ҳамзамон, ӯ муалими кафедраи ҷарроҳии кӯдаконаи Донишгоҳи тибии Тоҷикистон ба номи Абӯалӣ ибни Сино аст. Шоҳин Раҳмонов муллифи даҳҳо асари илмӣ ва китобу моногарафия мебошад.
Ӯ зимни суҳбат ба мо дар бораи ҷарроҳии анҷомшуда муфассал нақл кард. Ба таъкиди ин табиб, дугоникҳои сиамӣ яке аз нуқсонҳои мураккаби соҳаи ҷароҳии кӯдакон ва ҷароҳии кӯдакони навзод ба шумор меравад. Дар тамоми ҷаҳон ин мушкилоти мураккаб ба ҳисоб меравад. Ҳоло тамоми мутахассисони соҳаи ҷарроҳии кӯдакони навзод барои натиҷаҳои дилхоҳ ба даст овардан талош доранд:
«Дугоникҳои сиамӣ аз рӯи таснифоти кунунӣ ба навъҳо ҷудо мешаванд: “Қобили ҳайётдошта” ва “ғайри қобили ҳайётдошта”. Як навъи дигари беморӣ “паразитӣ” аст. Беморе, ки мо ба табобат фаро гирифтем, аз рӯйи таснифот ба гуруҳи “паразити ҷанин” шомил мешуд. Барои амалиёти ҷарроҳӣ агарчи омодагӣ надида будем, аммо дар ин бора нақшаҳо мавҷуд буд, ки дар сурати муроҷиат чӣ корҳоро анҷом бояд диҳем. Албатта мо дар ин амалиёти ҷарроҳӣ 3 шабонарӯз омодагӣ дидем. Дар давоми 3 шабонарӯз, мо бо устодони таҷрибадори хеш машварат карда, аз мутахассисони кишварҳои хориҷӣ аз ҷумла, Русия, Швейтсария маслиҳат пурсидем.»
Шоҳин Раҳмонов нақл мекунад, ки амалиёти ҷарроҳии онҳо бе ориза гузашт. Ҳама таҳдидҳо рафъ шуданд ва хушбахтона, ҳолати навзод хуб буда, ӯро ба хона рухсат карданд.
Баҳруллои Маҳмадшариф
