Дар Олимпиадаи байналмилалии XIV International Olympiad Antaly, ки аввоили моҳи ноябр дар шаҳри Анталияи Туркия идома ёфт, ҳазорон хонандаи синфҳои 5 -11 аз кишварҳои мухталифи дунё дар он ҳаққи иштирок доштанд. Ҳудуди 1,5 ҳазор наврас аз Тоҷикистон дар ин мусобиқа ширкат карданд.
Ҳасанзода Ҳамро ва Нурзода Анисҷон ҳарду ғолибони олимпиада аз Тоҷикистон мебошанд. Анисҷон дар синфи 5-ум ва Ҳамро дар синфи 11-уми мактаби байналмилалии «КОНТОФИЛД»-и шаҳри Душанбе таҳсил мекунанд. Ҳар ду аз фанни забони англисӣ дар олимпиада рақобат карда, мақоми аввалро касб намуданд.
Ба нақли Анисҷон, ӯ 2 моҳ омодагӣ дида буд, ки дар олимпиада корашро осон намуд.
«Балантарин бал 40 муқаррар гардида буд ва ман 36 балро соҳиб шудам. Дар байни 1200 иштирокчӣ мақоми аввалро касб кардам. Ман эҳсоси хурсандӣ мекардам. Мехоҳам боз дар олимпиада иштирок кунам. Зеро, баъди пирӯзӣ ба саҳна баромадан, гирифтани мукофотҳо ва қарсакҳои бешумор бароят гуворост.» — мегӯяд Анисҷон.
Ҳамро Ҳасанзода имкони иштирок дар ду фанро дошт, вале маҳз англисиро интихоб кард.
«Ман низ қабл аз рафтан ба Анталия ҳудуди ду моҳ омодагӣ дида будам. Ҳамин омодагиҳо кори моро дар олимпиада осон кард. Аз Тоҷикистон 1500 нафар ширкат карданд, 52 хонандагони синфи 11-ум. Аз ин теъдод танҳо ман сазовори мақоми аввал гардидам.» — мегӯяд Ҳамро.
Олимпиадаи мазкур ҳамасола баргузор мегардад ва ҷавонони тоҷик дар он фаъолона ширкат мекунанд.
Довуд Акобиров
