Мусобиқаи футболи хурд барои дарёфти Ҷоми клуби футболи «Истиқлол» ба анҷом расид, ки фонди ҷоизаи он 100 ҳазор сомониро ташкил медод.
Дар мусобиқа 26 даста ширкат карданд. Дастаи Федератсияи футболи Тоҷикистон дар бозӣ барои ҷойи севум аз рӯи силсилаи пеналтӣ аз дастаи Шабакаҳои Барқӣ (1:1, 4:3) пурқувват буд.
Дар қувваозмоии ҳалкунанда, «Вавилон» аз мизбони мусобиқот — тими «Истиқлол» (2:1) қавитар буд.
«Ба ин тартиб, аз рӯи натиҷагирии мусобиқот, тими Федератсияи футболи Тоҷикистон, ки дар ҷойи севум қарор гирифт, бо медалҳои биринҷӣ мукофотонида шуда, 20 ҳазор сомонӣ мукофоти пулӣ гирифт. Барандаи медали нуқраи мусобиқот тими “Истиқлол” 30 ҳазор сомонӣ дарёфт кард. Ғолиби мусобиқаи «Вавилон» бо ҷом, медалҳои тилло ва ҷоизаи пулӣ ба маблағи 50 ҳазор сомониро соҳиб шуд.»,-хабар медиҳад ФФТ.
Кумитаи тадорукот инчунин беҳтарин бозигаронро муайян карда, туҳфа тақдим намуд. Беҳтарин дарвозабо -Фирӯз Бозоров (Вавилон) дониста шуд. Шаҳзод Сулаймонов («Истиқлол») соҳиби ҷоизаи беҳтарин нишонзан гардид. Куҳансолтарин бозигари мусобиқа Саидасрор Саидов («Диёр Трэвел») буд.
