Муҳаммадҷон Неъматов донишҷӯи соли дуюми Донишгоҳи технологии Тоҷикистон буда, аллакай чандин барнома сохтааст.
Барномаеро бо «Assistant offline» таҳия кардааст, ки вазифаҳои мухталифро иҷро менамояд. Корбурди барнома бидуни интернет буда, ба компютер бо сухан фармон медиҳӣ ва он иҷро мекунад. Аммо ҳоло фармонҳо бо забони русӣ дода мешавад. Муҳаммад тасмим дорад, ки забони тоҷикиро ворид намояд.
Ӯ мегӯяд, бо анҷом додани ин корҳо мехоҳад кори рӯзмарраи мардумро осон намояд.
Ба бовари Муҳаммадҷон, коргоҳҳо баъзе барномаҳоро аз хориҷ харидорӣ мекунанд. Дар ҳоле, ки барномасозоне амсоли ӯ ин корҳоро анҷом дода метавонанд. Аз ҷумла, барномаи чеҳрашиноси Face ID-ро, ки Муҳаммадҷон аллакай сохтааст.
Муҳаммадҷон дар аввал футболбоз шудан мехост, вале кор бо компютер ва барномаҳои компютерӣ саволҳои ҷолибро ба зеҳни ӯ оварда Муҳаммадҷонро ба технология вобаста кард. Ҳатто ӯро водор кард, ки шуғли ояндаро тағйир диҳад.
«Вақте ба бозиҳои компютерӣ ғарқ мешудаму бо барномаҳои компютерӣ кор мекардам, дар бораи чӣ гуна сохтани онҳо маълумот надоштам.»,-нақл мекунад Муҳаммадҷон.
Муҳаммадумар Маҳмадзода
