Ин навбат меҳмони барномаи “Бол” Меҳрона Мирзоева буд. Ҷавондухтаре, ки ҳоло дар шаҳри Мюнхени Олмон кору таҳсил менамояд.
Меҳрона нақл мекунад, ки аз замони мактабхонӣ орзуи дар хориҷ таҳсил карданро дошт ва ӯ пайваста барои амалишавии ин орзуяш талош мекард.
Меҳрона дар Душанбе таваллуд шуда, дар ин шаҳр ба воя расидааст. Хатмкардаи Коллеҷи омӯзгории шаҳри Душанбе буда, дар як боғчаи хусусӣ низ мураббии гурӯҳи руссӣ буд. Дар як маркази забономӯзӣ забони олмониро омӯхта тариқи барномаи “Au Pаir” ба Олмон сафар кард.
“Ростӣ, дар аввал волидонам намехостанд ва ҳам бовар надоштанд, ки ман ба Олмон меоям. Таҳсил дар хориҷ орзуи ман буд ва ҳамеша талош мекардам. Бо гузашти имконият пайдо намуда ҳуҷҷатҳоямро таҳия кардам ва падару модарам низ муқолибият накарданд.”, — мегӯяд ӯ.
Меҳрона аз моҳи январи соли 2021 дар Олмон қарор дорад. Ӯ дар аввал тариқи барномаи “Au Pаir” ба Олмон роҳ ёфт. Мувофиқи барномаи мазкур ӯ ҳам таҳсил мекарду ҳам дар хонаи оилаи олмоние зиндагӣ. Вале пас аз 6 моҳ тариқи барномаи дигар ба мактаби махсуси касбӣ дохил шуд.
Ҳоло дар мактаби касбӣ бо ихтисоси меҳмондор таҳсил мекунаду дар яке аз меҳмонхонаҳои шаҳри Мюнхен таҷриба меандӯзад.
Меҳрона сайёҳатро дӯст медорад ва ба кишварҳои дигар сафар мекунад ва аз дидаҳояш ба обуначиҳояш нақл менамояд.
Меҳрона ба ҷавондухтарони тоҷик, ки бо барномаи “Au Pаir” таҳсил кардан мехоҳанд кумак мекунад.
Ҳафизуллоҳ Тоҳирӣ
