БОЛ — аз баландпарвозиҳо ба саросари олам ва аз кору таҳсили ҷавонони тоҷики хориҷи кишвар қисса мекунад. Меҳмони навбатӣ Салмон Юнусов аст, ки аз кору таҳсилаш дар Олмон қисса мекунад.
Ин ҷавони тоҷик бо барномаи «Ausbildung» ба Олмон расид ва ба ҷуз таҳсил, кор низ мекунад.
Тибқи ин барнома ҷавонони аз 18 то 30-сола метавонанд ба Олмон роҳ ёфта, пас аз хатми муассисаи касбомӯзӣ дар дигар макотиби олии ин кишвар таҳсили хешро идома диҳанд.
Салмон мегӯяд, таҳсил душвор нест, зеро, як ҳафта дарс ва ҳафтаи дигар дониши хешро дар амал тадбиқ менамоянд.
Ӯ мутахассиси низоми гармидиҳию сардидиҳӣ ба манзилу коргоҳҳо мегардад. Ба нақли Салмон, дар як рӯз 8,5 соат кор мекунад ва барои кораш музд низ мегирад.
«Бо барномае, ки мо ба ин кишвар омадаем, ҳар нафаре, ки синнаш аз 18 то 30-сола аст ва забони олмониро то андозае медонад, имкони таҳсилу корро пайдо мекунад.»— гуфт ӯ.
Салмон соли сеюм аст, ки дар Олмон таҳсил дорад ва дар миёни ҳамсабақонаш пешсаф буда бо баҳои аъло мехонад. Устодонаш аз ӯ тавсиф карда, Салмонро намуна мегуфтанд, ки «бубинед, як меҳмон аз шумо олмониҳо беҳтар таҳсил мекунад!»
Салмон тариқи Instagram (зиёда аз 16 ҳазор обуначӣ дорад) ва TikTok (2 ҳазор обуначӣ) дар бораи чӣ гуна ба Олмон рафтан, инчунин баъзе калимаҳову ҷумлаҳои зарурии олмониро меомӯзонад.
Салмон хатмкардаи Литсейи техникии Донишгоҳи техникии Тоҷикистон буда, ҳамзамон, як сол дар ин муассисаи олии кишвар таҳсил кардааст.
Ҳафзилллоҳ Тоҳирӣ
