Хоҷагии истеҳсолии “Ёсинҷон” қаблан 5 кг пистаро дар як рӯз коркард мекард, акнун бо дастрас намудани таҷҳизоти муосир иқтидораш 30 баробар афзӯда, дар як рӯз то 150 кг пистаро коркард менамояд.
Ашӯралӣ Самадов, сармутахассиси хоҷагии деҳқонии “Ёсинҷон”-и Ҷамоати Қизил-қалъаи ноҳияи Хуросон буда, дар баробари дигар корҳои хоҷагӣ, ҳамзамон, ба коркарди писта низ машғул аст.
Қаблан Ашӯралӣ аз заминҳои хоҷагӣ, ки бештараш дарахтони писта аст, ҳосилро ҷамъоварӣ намуда, коркард мекард. Дар ин кор ҳамсоягонро низ ҷалб мекард, вале миқдори маҳсулоти ниҳоӣ ҳамагӣ 5 кг дар як рӯз буд.
Роҳбарии хоҷагии “Ёсинҷон”-ро ҳамсараш Раҷабамоҳ Бобоева ба уҳда дорад. Ин зан дар якҷоягӣ бо шаҳвараш корхонаи коркарди пистаро, ки аз ҷониби лоиҳаи USAID оид ба “Рақобатпазирии агробизнес дар Тоҷикистон” маблағгузорӣ шудааст, фаъол намуданд.
Технологияҳое, ки аз ҷониби лоиҳаи мазкур ба ин коргоҳ тақдим шудааст, 100 000 доллар арзиш дорад.
Акнун хоҷагии “Ёсинҷон” дар мавсими навбатӣ, ки аз моҳи август оғоз мешавад, метавонад дар як рӯз то 150 кг анвои гуногуни пистаро коркард намояд ва зиёда аз 5 нафаро бо ҷойи кори доимӣ таъмин кунад.
Хоҷагии “Ёсинҷон” талош дорад маҳсулоти тайёрро ба хориҷ низ содир намояд.
Хосиятхон Комилова намояндаи Лоиҳаи USAID оид ба «Рақобатпазирии агробизнес дар Тоҷикистон” мегӯяд, ду ноҳияи пистапарвари вилояти Хатлон ноҳияи Хуросон ва Панҷ 6 коргоҳи коркарди писта бо таҷҳизоти замонавӣ муҷаҳҳаз шудаанд, ки дар ояндаи наздик пистаҳои истеҳсоли Тоҷикистон бо бренди “Made in Tajikistan” ба бозорҳои ҷаҳонӣ роҳ меёбанд.
Шералӣ Давлатов
