Алишер Қосимов ният дорад, ки таҳсилро дар Донишгоҳи шаҳри Сан-Франсискои ИМА идома диҳад ва касби ояндаашро низ интихоб кардааст.
“Ҷарроҳи масъулиятшинос шуданиям. Ҷарроҳе, ки ба ҳама мизоҷон баробар нигоҳ кунад. Онҳоро ба дорову нодор ҷудо накарда, табобат намояд.”, — мегӯяд ҷавон.
Алишер Қосимов, хонандаи синфи 11-и Литсей барои хонандагони болаёқат дар шаҳри Хуҷанд соҳиби гранти омӯзишӣ ба маблағи 1 миллион доллар гардида, имкони идомаи таҳсил дар яке аз ҳашт донишгоҳи бонуфӯзи Амрико ва як донишгоҳи Швейтсарияро ба даст овард.
Аллакай 9 донишгоҳҳои бонуфӯзи ин кишварҳо бо ирсоли мактуби расмӣ омодагии худро ба қабули хонандаи тоҷик тариқи буҷавӣ эълон намудаанд, ки маблағи умумии он беш аз 1 миллион долларро ташкил медиҳад.
Алишер Қосимов як тан аз хонандаҳои фаъоли Литсей ба ҳисоб рафта, соли ҷорӣ дар озмунҳои HIPPO Olympiad ва Bismuth фосилавӣ ширкат ва мақомҳои намоёнро ишғол кард. Ҳамчунин эссеи навиштаи ӯ баҳои баланд гирифт.
“Аз ҳаёти макабӣ эссе навиштам. Яъне, дар эссе мушоҳида ва лаҳзаҳое, ки дар он масъулиятшиносӣ ва ҷаҳонбинии ман дарҷ гардидааст. Онро дар давоми 4 моҳ навиштам. Аввал, эссеро дар сиёҳнавис ба забонҳои русию анлисӣ навишта будам. Сипас бо ёрии муаллимони кордони литсей онро таҳрир кардам.”, — ба ёд меорад Алишер.
Алишер Қосимов ба директори Литсей барои хонандагони болаёқат дар шаҳри Хуҷанд Сурайё Негматова ва дигар устодонаш изҳори сипос мекунад, ки ҳамеша ӯро дастгирӣ менамоянд.
Файзуллохон Обидов
