Аз ҳодисаи бархурди як автобус ба ҳафт таксӣ дар Душанбе аксарият огоҳӣ доранд ва ҳамчунин корбарони фаъоли фазои маҷозӣ медонанд, ки ронандаи автобус бо кумаки як ширкат зиёни ба мошинҳо расонидаро ҷуброн ва бо дастгирии мардуми хайрхоҳ пули зиёд ба даст овард. Баъд аз чанд рӯзи ҳодиса дар саҳифаи фейсбукии Донишгоҳи техникии Тоҷикистон тасвири ин манзара бо номи “Меҳри миллат” нашр шуд, ки муаллифи он донишҷӯи соли дуюми ин муассиса аст.
Хабарнигори jom.tj муаллифи тасвир- Саидбек Иззатзодаро пайдо ва бо ӯ суҳбат намуд.
Ба нақли Саидбек, навореро дар бораи зиндагии ронандаи автобус ва кумаку дастгирии мардум тамошо карда, дар зеҳнаш идеяи тасвири ҳолат пайдо шуд, вале нопурра, чун намедонист чӣ гуна онро рӯйи коғаз биёрад. Дарси кушод ва интихоби мавзӯи озод боис гардид, ки расми мазкурро тасвир намояд.
“Бо ташаббуси ректори донишгоҳ муҳтарам Давлатзода Қудрат Қамбар донишҷӯёни равияи дизайни меъморӣ ҳар ҳафта як бор “Аксияи эҷодӣ” мегузаронанд. Ин як дарси кушод аст, ки бо ҳамкурсон ва муаллимон ба боғҳои пойтахтамон рафта, дар мавзӯи озод тасвир меофарем. Дар яке аз чунин дарсҳо тасмим гирифтам, ки пурсарусадотарин мавзӯи ҳафтаро тасвир кунам.”, — нақл намуд Саидбек.
Саидбек мегӯяд, дар дарси кушод танҳо қисми муайяни расмро тасвир карда буд ва онро дар хона комил намуда ба падараш нишон дод. Бинандаи дуюми акс муаллимаи донишгоҳ буд.
Муаллиф сабаби “Меҳри миллат” номгузорӣ намудани тасвирро дар иттифоқӣ ва муҳаббати миллат арзёбӣ мекунад.
Саидбек корбари фаъоли шабакаҳои иҷтимоӣ нест ва сербинанда гардидани тасвирашро аз муаллима Фирӯза Эмомова ва ҳамкурсонаш фаҳмидааст.
Намояндагони Донишгоҳи техникии Тоҷикистон ба номи академик М.С. Осимӣ расми “Меҳри миллат”-ро ба ронандаи автобус ва модараш тақдим намуданд.
Саидбек орзуи ҳавонавард шуданро дошт, баъдтар меҳри табибӣ дар дилаш ҷӯш зад, вале ҳоло бо роҳнамоии падар соҳаи лоиҳакаширо интихоб карда, донишҷӯи кафедраи дизайни муҳити меъморӣ ва тармим аст.
Ӯ мехоҳад оянда дар сохтмонҳои кишвар ҳамчунин лоиҳакаш ва ороишгар фаъолият намояд.
Ҳ. Тоҳирӣ
