Дар муассисаҳои таҳсилоти умумии ҷумҳурӣ омӯзиши фанни забони русӣ аз синфи 2 ва забони англисӣ аз синфи 3 оғоз меёбад. Тибқи барномаи таълимӣ барои омӯзонидани забони русӣ аз синфи 2 то 11 дар ҳаҷми 27 соат дарс дар 1 ҳафта, барои таълими забони англисӣ бошад, аз синфи 3 то 11 дар ҳаҷми 24 соат ҷудо шудааст. Дар муассисаҳои таҳсилоти умумӣ равияҳои ҷамъиятиву гуманитарӣ, математикиву иқтисодӣ ва табиӣ дошта, барои омӯзиши ин забонҳо аз 18 то 20 соат дар як ҳафта ҷудо шудааст.
Дар системаи таҳсилоти ибтидоии касбӣ омӯзиши забонҳои русӣ ва англисӣ дар гурӯҳҳои тоҷикӣ дар давоми сол дар ҳаҷми аз 50 то 200 соат ба нақша гирифта шудааст. Дар гурӯҳҳои таълимашон ғайритоҷикӣ ва дар факултетҳои муассисаҳои таҳсилоти миёна ва олии касбӣ омӯзиши забонҳои русӣ ва англисӣ дар давоми 4 семестр идома меёбад.
Дар 3826 муассисаи таҳсилоти миёнаи умумӣ 7076 омӯзгорони фанни забони русӣ ва 5820 омӯзгорони забони англисӣ фаъолият доранд. Омода намудани мутахассисон барои муассисаҳои томактабӣ ва таҳсилоти умумии Ҷумҳурии Тоҷикистон, дар муассисаҳои таҳсилоти миёна ва олии касбӣ ба роҳ монда мешавад. Дар ҷумҳурӣ Донишкадаи давлатии забонҳои Тоҷикистон ба номи Сотим Улуғзода бевосита барои омода намудани мутахассисони забонҳои русӣ ва англисӣ фаъолият мебарад. Инчунин факултетҳои забон ва адабиёти рус ва забони англисӣ дар Донишгоҳи давлатии омӯзгории Тоҷикистон ба номи Садриддин Айнӣ, Донишгоҳи миллии Тоҷикистон, Донишгоҳи славянии Россия-Тоҷикистон, Донишгоҳи давлатии Хуҷанд ба номи Б.Ғафуров, Донишгоҳи давлатии Кӯлоб ба номи А.Рӯдакӣ, Донишгоҳи давлатии Қурғонтеппа ба номи Н.Хусрав, Донишгоҳи давлатии Хоруғ ба номи М.Назаршоев мавҷуд буда, дар муассисаҳои таҳсилоти олии касбӣ 20 кафедраи забон ва адабиёти рус (141 омӯзгорон) ва 22 кафедраи забони англисӣ (273 омӯзгорон) фаъолият мекунанд.
