Зикруллоҳхуҷа Асророви 21-сола бо вуҷуди доштани имконияти маҳдуди ҷисмонӣ беш аз 50 дастгоҳу таҷҳизот сохтааст, ки аксари он дар корҳои хоҷагӣ истифода бурда мешаванд.
Зикруллоҳхоҷа аз 16-солагӣ ба сохтани дастгоҳҳои гуногун пардохт ва онҳоро аз ашёҳои нолозим тавлид мекунад. Ӯ маҳсули дасташро дар даҳҳо озмуну олимпиадаҳо пешниҳод ва сазовори ҷойҳои ифтихорӣ гардидааст.
Электромобил яке аз намунаҳои кори Зикруллоҳхоҷа Асроров буда, бо қувваи барқ ҳаракат мекунад.
“Ман электромобилро соли гузашта аз оҳанпораҳои нолозим сохтам. Ин электромобил бо қувваи барқ аз 10 то 12 км роҳро тай мекунад. Аз овони кӯдакӣ орзу мекардам, ки бузург шуда дар заводи мошинсозӣ кор мекунам. Орзуҳои кӯдакиро бо сохтани электромобил бароварда кардам. Бо кумаки шогирдон давоми 5 моҳ ин электромобилро сохтам.”,-нақл кард Зикруллоҳхоҷа.
Баро иҷрои корҳои саҳро аз ҳамин мошини сохтааш истифода мекунад. Зикруллоҳхоҷа дар озмуни ҷумҳуриявии “Илм-фуруғи маърифат” маҳз бо ҳамин ихтирооташ мақоми намоёнро соҳиб гардид.
Қаҳрамони мо чандин шогирд дошта, 3 нафари онҳо дар озмуну олимпиадаҳо иштирок ва мақомҳои ифтихориро касб кардаанд.
“Ҳамарӯза бачаҳои деҳа баъди дарс ба наздам меоянд ва ба машғулиятҳои ман зеҳн мемонанд. Ман ҳар як амаламро бо камоли майл ба онҳо мефаҳмонам.”,-изҳор дошт Зикруллоҳхоҷа.
Агарчи пойи равон надорад, вале дилсард нест ва пайи амалисозии орзуҳои бузургаш талош меварзад.
Баҳруллои Маҳмадшариф
