Чиликдангалу биҷилбозӣ бозиҳои баҳорӣ ва маҳбуби кӯдакону наврасони деҳаи Лолазори ҷамоати деҳоти Машъали ноҳияи Вахш аст.
Олимҷон Қиличеви 11-сола аз деҳаи Лолазор буда, нақл мекунад, ки бо фаро расидани фасли зебои баҳор ва дамидани сабза дар вақтҳои холигӣ ба бозиҳои наврӯзӣ машғул мешаванд.
“Вақте фасли тирамоҳ медарояд бориши борону барф низ шурӯъ мегардад. Дигар ҷиликдангалу биҷилбозӣ карда намешавад. Биҷилҳоямонро то фаро расидани фасли баҳор дар хона нигоҳ медорем.”,- мегӯяд О.Қиличев.
Дар дасти аксарияти наврасони деҳаи Лолазор то 6-7 биҷил дидан мукин аст. Онҳо мисли наврасони дигар минтақаҳо биҷилро аз бозор ё аз нафаре харидорӣ намекунанд. Чунки волидайнашон ба чорводорӣ машғул ҳастанд.
“Вақте сабза аз замин баромад, як нафар биҷилҳояшро гирифта ба хонаи 5-6 нафар рафта, барои бозӣ кардан даъват мекунад. Дигарон бозии моро дида, биҷилҳояшонро гирифта бо мо ҳамроҳ мешаванд.”,-қисса мекунад Олимҷон.
Аҳлиддин Ашӯрови 15-сола мегӯяд, бозии чиликдангал барояшон хеле шавқовар ва ҷолиб аст. “Чӯбе, ки дарозиаш як ваҷаб аст, онро чилик ва чӯби ним метраро дангал мегӯем. Барои ҳамин бозии мо «Чиликдангал» ном гирифтааст.»
Сокинони деҳаи Лолазори ҷамоати деҳоти Машъали ноҳияи Вахши вилояти Хатлон ҳар сол иди Наврӯзро таҷлил мекунанад. Мусобиқаҳои гӯштию бузкашӣ ва бандкаширо ташкил менамоянд. Кӯдакон низ дар баробари биҷилбозию чиликдангал дар маросими наврӯзӣ мисли калонсолон ба майдони гӯштин мебароянд.
Амонҷон Муҳиддинов
