Тоҷикистон дар Намоишгоҳи байналмилалии риштаи Истанбул бори даҳум ширкат мекунад. Пас аз танаффуси кӯтоҳ ба сабаби пандемияи Ковид-19, кишвар иштирокро дар ин намоишгоҳ идома хоҳад дод.
Аз соли 2012 ба баъд, зиёда аз 15 ширкат аз Тоҷикистон дар ин намоишгоҳ, ки бузургтарин намоишгоҳи тахассусӣ дар минтақа унвон мешавад, ширкат кардаанд.
Маҳсулоти чор корхонаи ресандагӣ девораи Тоҷикистонро дар ин намоишгоҳ оро медиҳад: “Ваҳдат Текстил” (Ёвон ва Душанбе), “Ресандаи Хатлон” (Кӯшониён), “Стандарт Текстил” (Спитамен), ва “ХИМА Текстил” (Ёвон). Чор корхонаи дигар ҳам дар ҳайъати Тоҷикистон ба намоишгоҳ барои боздид, омӯзиши равандҳои нав, харидории маводи хоми лозима ба монанди риштаи омехта ва аксессуарҳо ва барқарор кардани робитаҳои нави тиҷоратӣ мераванд: “Ноҳид” (Истаравшан), “Органик Ярн” (Ҷаббор Расулов), “Раҳимов А.А.” (Хуҷанд), ва “ТоҷТекс” (Душанбе).
Намоишгоҳи байналмилалии риштаи Истанбул дар соли 2022 мизбони беш аз 300 иштироккунанда ва зиёда аз 10 000 боздидкунанда аз тақрибан 80 кишвари ҷаҳон буда, пешсафони соҳаро, ки бозори байналмилалии риштаро муайян мекунанд, гирд меорад. Дар он, ки ҳамчун “қалби саноати ришта дар АвруОсиё” шуҳрат ёфтааст, садҳо навъи риштаву ресмонҳои табииву сунъӣ, ба монанди риштаи пахтагин, пашмин, абрешимӣ, эластан, акрил, вискоза ва ғайра ба маърази тамошо гузошта мешавад.
Акс аз сомонаи https://www.shoes-report.ru/
