Дар раддабандии Quacquarelli Symonds Донишгоҳи миллии Тоҷикистон миёни 450 донишгоҳи беҳтарин мақоми 241-умро ишғол намудааст.
«Ширкати «Quacquarelli Symonds» рейтинги донишгоҳҳои беҳтарини Аврупои Шарқӣ ва Осиёи Марказӣ- — 2022 ( QS World University Rankings: EECA (Emerging Europe and Central Asia)-ро нашр кард.»-хабар медиҳад АМИТ «Ховар».
Донишгоҳи миллии Тоҷикистон бо таърихи 70-сола яке аз муассисаҳои олии пешқадам ва калонтарин дар Ҷумҳурии Тоҷикистон маҳсуб мешавад ва ҳоло 19 факултет дошта, таълим аз рӯи се давраи таълим: бакалавр, магистр ва PhD аз рӯи 98 риштаи таҳсил сурат мегирад.
ДМТ бо беш аз 190 донишгоҳу донишкадаҳои хориҷӣ созишномаҳои ҳамкории дуҷониба имзо кардааст. Донишгоҳ узви беш аз 10 ассотсиатсияи байналмилалӣ, аз қабили Ассотсиатсияи донишгоҳҳои Авруосиё, Донишгоҳи Созмони ҳамкории Шанхай, Донишгоҳи кишварҳои ИДМ будааст.
Аз таърихи ДМТ
Таъсиси аввалин университет дар Ҷумҳурии Тоҷикистон ва рушди минбаъдаи он ба номи аллома Бобоҷон Fафуров – сарвари онвақтаи ҳизби коммунистии Тоҷикистон марбут аст. Бобоҷон Fафуров ва Вазири мактабҳои олии СССР С. Кафтанов ба роҳбарияти ҳизбӣ ва Шӯрои Вазирони СССР дар бораи зарурати дар Тоҷикистон ташкил намудани Университети давлатӣ таклиф пешниҳод карданд. Пешниҳоди сарварони РСС Тоҷикистон аз ҷониби роҳбарияти Иттифоқи Шӯравӣ мусбат пазируфта шуд. 21-уми марти соли 1947 дар Маскав қарори Шӯрои Вазирони СССР таҳти рақами №643 оид ба таъсис додани Университети давалатии Тоҷикстон аз ҷониби Раиси Шӯрои Вазирони СССР И.Сталин ва Раиси умури идораи он Я.Е.Чадаев ба имзо расид. Қарори мазкур таъсиси 4 факултет: физикаю математика (бо шуъбаи химия); хокшиносӣ-геологӣ-география; биология; таъриху филология ҳамроҳ бо шуъбаи шарқшиносиро пешбинӣ мекард.
Ректори кунунии Донишгоҳи миллии Тоҷикистон Қобилҷон Хушвахтзода буда, ӯ чаҳордаҳумин роҳбари донишгоҳ маҳсуб мешавад.
