Дар қатори намоиши 10 филми бесадо дар Душанбе, филми тасвирии “Ҳувайдо” низ пешниҳоди бинанда гардид.
Ёдовар мешавем, ки дар бораи Ҳувайдо Тиллозодаи 5-сола, ки соли 2018 дар шаҳри Серпухови вилояти Маскав таҷовуз ва ба қатл расонида шуд, чанде қабл филми тасвирии беовоз таҳия шуд.
Агарчи дар ин филм овоз нест, вале бо тамошои он ҳама он рӯзи шумро дар пусту устухони хеш эҳсос карда, қалб ба фиғон меояд.
Лолисанам Улугова муаллиф ва коргардон ин филм аст, ки мегӯяд, пас аз як соли фоҷиа дар ин бора иттилоъ пайдо кард:
“Матлаберо дар бораи тафсилоти куштори ин духтарак хондам, тамоми дарди падару модарашро ҳис кардам. Мегӯянд, ки эҷодкорон эҳсосотӣ ҳастанд ва ҳамачиро зуд ба худ қабул мекунанд, воқеан, ин ҳодиса маро такон дод. Дар аввал мехостам, ки сенария нависам ва як саҳнаи хурде омода кунам. Аммо хар боре, матлабро дар бораи Ҳувайдо мехондам буғз гулугирам мекарду ашк аз чашмонам ҷорӣ мешуд. Ман тасмим гирифтам ин филмро омода ва таваҷҷуҳи ҷомеаро ба ин мушкилот ҷалб намоям.”
Филми “Ҳувайдо” ахиран дар “Фестивали филмҳои беовоз”, ки рӯзҳои 24-26 ноябр дар шаҳри Душанбе баргузор гардид, намоиш дода шуд.
Дар он 10 филм аз Тоҷикистон, Узбекистон ва Олмон пешниҳоди бинанда гардид.
Бояд гуфт, дар Тоҷикистон ба таҳияи филмҳои беовоз тавваҷҷӯҳ кам аст.
Дар замони истиқлол Соҳибёри Толиб ягона коргардонест, ки филми кӯтоҳи ҳунариро бо номи “Талош” таҳия кардааст.
О. Маҳмад
