Муҳаммадсолеҳ Баротови 14-сола (вазни 50кг) дар риштаи ҷиу-ҷитсу чемпиони ҷаҳон гардид. Ӯ дар чемпионати ҷаҳон оид ба ҷиу-ҷитсу, ки нимаи моҳи ноябр дар шаҳри Абудабии Аморати мутаҳидаи Араб баргузор гардид ба ҷуз ин унвон, дар мусобиқае, ки байни Академия ва клубҳо доир шуд, сазовори медали тилло гардид.
Муҳаммадсолеҳ Баротов 31 декабри соли 2007 дар шаҳри Душанбе таваллуд шудааст. Ӯ аз 9-солагӣ бо роҳнамоии падараш ба тамрин оғоз кард.
“Азбаски падарам варзишро бисёр дӯст медошту худ ҳамеша ба варзиш машғул буд, мо-фарзандонашро ҳам ба ин роҳ ҳидоят намуд. Ҳоло ман ва ду додарам аз рӯи намуди варзиши ҷиу-ҷитсу тамрин менамоем.”,-мегуяд Муҳаммадсолеҳ.
Вай муддати 5 соли тамрин дар беш аз 50 мусобиқаи сатҳи милливу байналмилалӣ иштирок намуда, дар ҳамаи онҳо дастболо гардидааст. Ба ғайр аз Муҳаммадсолеҳ ду бародари хурдиаш низ ба ин намуди варзиш машғул ҳастанд. Онҳо низ дар чандин мусобиқа дастболо гардидаанд.
Алиҷон Давлатов, президенти Федератсияи миллии ҷиу-ҷитсуи Тоҷикистон Муҳаммадсолеҳро роҳнамоӣ мекунад.
“Муҳаммадсолеҳ, шахси бисёр ҳам серҳаркат ва хушзавқ мебошад. Ӯ нисбат ба ҳамсабақони худ маҳорати баланд дошта, қоидаву усулҳоеро, ки барои мағлуб намудани ҳарифи худ аз ҷониби федератсияи байналмилаӣ тасдиқ шудааст, ҳарчӣ зудтар аз худ менамояд. Ғайр аз ин, вай хулқу атвори наку дошта, нисбат ба калонсолон эҳтироми хосса дорад. Маҳз ҳамин рафтору кирдораш ӯро ба қуллаҳои баланд расонид.”,-изҳор дошт Алиҷон Давлатов.
Ҳоло Муҳаммадсолеҳ Баротов номзади устоди варзиш ва узви дастаи мунтахаби варзишгарони Тоҷикистон мебошад.
Баҳруллои М.
