Маркази савдову хизматрасонӣ ва фароғатии “Сиёма молл” ба истифода дода шуд.
Ин Маркази савдою фароғатӣ дар ноҳияи Фирдавсии пойтахт, дар шафати “Боғи фарҳангу фароғати ба номи Абулқосими Фирдавсӣ” аз ҷониби Ҷамъияти дорои масъулияти маҳдуди “Авесто Гурӯҳ” бунёд гардидааст.
Марказ аз 3 ошёна иборат буда, майдони умумии он зиёда аз 3,5 гектарро дар бар мегирад ва бинои иншоот дар масоҳати 24 000 метри мураббаъ сохта шудааст.
Дар бинои “Сиёма молл” 86 нуқтаи савдою тиҷорат, хизматрасонӣ, толору мағоза ва марказҳои дилхушию фароғатӣ мавҷуд аст.
Даромадгоҳи асосии бино бо атриуми болокушода ва қандилҳо оро ёфта, ҷиҳати хизматрасонӣ дар дохили бино 6 эскалатор ва 4 лифт насб гардидааст.
Дар ошёнаи 2-юми бино маркази дилхушии кӯдакона, нуқтаҳои ҳозиразамони хӯрокҳои зудомодашаванда ва толори муосири синамо мавҷуд аст. Инчунин дар нуқтаҳои алоҳидаи марказ барои мизоҷон хӯришҳои гуногун, таомҳои милливу аврупоӣ омода ва пешниҳод мегардад.
Дар ошёнаи 3-юми бино дафтари маъмурияти Маркази савдову хизматрасонӣ ва фароғатии “Сиёма молл”, толори вохӯрӣ ва ҳуҷраҳои муосири кории ширкатҳои ватанию хориҷие, ки дар ин ҷо фаъолияти тиҷоратӣ ва хизматрасонӣ доранд, ҷой гардидаанд.
