Имрӯз, 30 октябр дар Душанбе фестивали “Оши палов” баргузор гардид.
Ҷашни мазкур дар ҳудуди муассисаи давлатии “Наврӯзгоҳ” баргузор шуда, дар доираи фестивал 50 деги ошпазӣ, аз ҷумла, 40 адад аз шаҳри Душанбе ва аз намояндагиҳои узви кишварҳои ИДМ дар Тоҷикистон 10 дег гузошта шуд. Дар умум, 5 ҳазор кг оши палав дар ин ҷашнвора омода гардид.
Дар бузургтарин дег 4 тонна ош пӯхта шуд. Барои омода намудани ош дар ин дег 800 кг биринҷ, 170 литр равған, 270 кг гӯшт, 15 кг думбаи гӯсфанд, 1 тонна сабзӣ, 150 кг пиёз, 30 кг намак, 8 кг зира, 30 кг кишмиши ошӣ, 8 кг лиму, 250 дона тухми бедона, 80 бедона, 8 кг сирпиёз, 8 кг қазӣ ва 8 кг гӯшти хушккардашуда истифода шудааст.
Тибқи низомномаи фестивил ғолибон аз рӯйи 3 номинатсия, аз ҷумла, шоҳҷоизаи озмун “Беҳтарин оши палав”, номинатсияи “Беҳтарин дастурхони ошӣ” ва “Беҳтарин ошхӯр” муайян карда шуданд.
Ёдовар мешавем, ки соли 2015 Ҳукумати Ҷумҳурии Тоҷикистон пешниҳод намуд, ки Оши палавро ба феҳристи репрезентативии ЮНЕСКО оид ба фарҳанги ғайри моддӣ дар номинатсияи “Оши палав ҳамчун хӯроки анъанавӣ ва фазои иҷтимоию фарҳангии он дар Тоҷикистон» сабт гардад. Ҳамин тавр, Оши палави тоҷикӣ дар ҷаласаи 11-уми байнидавлатии ЮНЕСКО оид ба ҳифзи мероси фарҳангии ғайримоддӣ, ки аз 28 ноябр то 2 декабри соли 2016 дар шаҳри Аддис-Аббебаи Эфиопия баргузор шуд, дар феҳристи репрезентативии ЮНЕСКО расман сабти ном гардид.
Фурқати Низом
