Қоидаҳои нави Иттиҳоди Аврупо оид ба рекламаи сиёсӣ ба иҷро медароянд, ки ҳадафашон ҷилавгирӣ аз таҳрифу идоракунии иттилоот ва дахолати хориҷӣ ба интихобот мебошад.
Солҳои охир дар интихоботҳои гуногуни Аврупо кӯшишҳои густариши хабарҳои бардурӯғ зиёд мушоҳида мешуданд.
Дар интихоботи президентии Руминия дар моҳи ноябри соли гузашта даври аввал беэътибор дониста шуд, зеро Суди конститутсионии кишвар ба маълумоти хадамоти махсус истинод кард, ки аз дахолати беруна ба маъракаи интихоботӣ ба нафъи номзади популист Кэлин Ҷорҷеску шаҳодат медод — ҳарчанд инро худи сиёсатмадор рад кард.
Тибқи қарорҳои нав, ки рӯзи ҷумъа ба иҷро медароянд, рекламаи сиёсӣ бояд дорои нишонаи шаффофият бошад. Дар ин нишона маълумоти асосӣ — аз ҷумла ҳувияти сарпараст, намуди интихобот ва маблағи пардохтшуда барои ҷойгиркунии реклама зикр мегардад.
Дар ҷараёни муҳокимаҳо кишварҳои узв ва порлумони ИА тағйироте пешниҳод карданд, ки аз ҷумла манъи маблағгузории хориҷӣ барои рекламаи сиёсӣ дар ҳудуди ИА-ро дар бар мегирад.
