IMEI -рақами силсилавии иборат аз 15 адад аст. Он дар дастгоҳи мобилӣ, талони кафолатӣ, дар қуттии телефон насб шудааст.
Ҳама гуна дастгоҳе, ки бо SIM-корт кор мекунад, IMEI дорад. Телефони дусимкартадор дорои ду IMEI аст. Агар Шумо IMEI-и дастгоҳи худро намедонед, пас, *#06# – ро дар телефони худ рақамчинӣ кунед.
Дар Тоҷикистон тибқи Қарори Ҳукумати Ҷумҳурии Тоҷикистон аз 31 марти соли 2020 (№ 208) рамзҳои IMEI бояд ба қайд гирифта шаванд.
Агар мехоҳед фаҳмед, ки IMEI-и телефони шумо дар махзани ягонаи миллӣ сабт шудааст ё не, бо рақамчинии *3366# дар дастгоҳи худ ё воридшавӣ ба сомонаи www.imei.tj. инро муайян намоед. Сабти ИМЕЙ дар системаи давлатӣ ройгон аст.
Ҳангоми воридсозӣ ба системаи давлатӣ агар телефон ё планшет аз расмиёти гумрукӣ нагузашта бошад, декларатсияи гумрукӣ талаб карда мешавад.
Барасмиятдарории гумрукии мол уҳдадории воридкунанда аст. Бинобар ин, зимни хариди телефон рамзи IMEI-ро тафтиш карда аз фурӯшанда дикларатсияи гумрукии молро талаб кунед. Зеро, дар декларатсия ҳатман бояд IMEI зикр мешавад.
Агар чунин нест, ин телефон қочоқ ҳисоба шуда, пас аз 30 рӯзи тақвимӣ хизматрасонӣ алоқаи мобилӣ барои ин дастгоҳ қатъ мегардад.
Агар худи Шумо барои истифода аз хориҷ телефон ё планшет ворид кардед, дар гузаргоҳи гумрукӣ аз намояндагони гумрукӣ дикларатсия ё эъломияи шакли Т6-пурсида онро пур кунед. Ин комилан ройгон аст.
Тибқи қонунгузории Тоҷикистон арзиши расмиёти гумрукӣ 15% андоз аз арзиши умумии дастгоҳро ташкил медиҳад.
Ворид намудани рамзҳои IMEI дар дастгоҳҳои мобилӣ, бо мақсади тиҷоратӣ воридшаванда ба низоми давлатӣ, тибқи тартиби муқарраршуда аз ҷониби шахсоне, ки дастгоҳҳои мобилӣро ба ҳудуди ҷумҳурӣ ворид кардаанд, амалӣ мегардад.
Тибки иттилои Хадамоти гумруки Тоҷикистон, дар соли 2022 ба кишвар расман 64 ҳазору 130 адад дастгоҳи мобилӣ ворид шудааст. Дар хамин ҳол, тибқи маълумоти Хадамоти алоқа, дар кишвар тақрибан 12 миллион рамзи IMEI фаъол мавҷуд будааст.
Аксҳо аз шабакаи интернет
