Меҳринисо Маъруфзода, маъюби гурӯҳи I-ум аст. Ӯ маъюб аз модар ба дунё наомадааст. Дар 18-солагӣ, ҳамагӣ 10 рӯз қабл аз тӯйи арусиаш фалаҷ шуда, аз роҳ рафтан бозмонд. Рӯзи 7 майи соли 2010 аз дарахт афтод, 17 май санаи тӯяшро мушаххас карда буданд.
Меҳринисо ҳоло 30 сол дошта, дар шаҳри Бохтари вилояти Хатлон зиндагӣ мекунад. Ҳар ду пой ва як дасташ ҳаракат намекунад. Бо як даст ҷиҳозу ашёи зебое медӯзаду мебофад ва бо ҳамин минвол рӯзгорашро таъмин мекунад.
Меҳринисо Маъруфзода, аз матоъҳо ҷузвдонҳои гуногун, болишт, чодарӣ, аз зарфҳои палстикӣ гулҳои ороишӣ таҳия мекунад. Маҳсулоташ харидор дорад. Қисмеро аз тариқи интернет мефурӯшад ва қисмеро харидорон аз манзилаш омада мебаранд. Дар чобарибиниҳои шаҳрию вилоятӣ ва ҷумҳуриявӣ маҳсули дасташ ба намоиш гузошта мешавад.
«Кореро, ки ман анҷом медиҳам, дигар маъюбон низ аз ӯҳдааш мебароянд. Онҳо ҳунар омӯзанд ва нони хешро пайдо кунанд.»,-мегӯяд Меҳринисо.
Меҳринисо Маъруфзода соли 2010 бо садҳо орзу барои чодари арӯсияш аз риштаву муҳраҳои гуногун пешчодарӣ омода кард. Вале бо амри тақдир орзуҳояш амалӣ нашуданд. Ҳар боре ба пешчодарӣ менигарад, рӯзҳои омодагии қабл аз тӯй ба ёдаш мерасанд…
Меҳринисо ба наздикӣ дар Ташкилоти ҷамъиятии маъюбони шаҳри Бохтар ба кор оғоз мекунад. ва ба ҳамтақдирони хеш ҳунар меомӯзонад. Ӯро зарур аст, ки аробаи маъбиашро бо ду даст ба ҳаракат дарорад. Аз сабаби онки як дасташ кор намекунад, барояш ин кор мушкил аст. Бинобар ин, мехоҳад хайрхоҳе барояш аробаи электрикӣ ҳадя намояд то ӯ ба кор бе кумаки касе расад.
Амонҷони Муҳиддин
