Разавӣ Навбаҳоров, варзишгари тоҷик, дар мусобиқаи бози қаҳрамонии Иёлоти Муттаҳидаи Амрико (US Open ‘USA sambo National Championship’), ки дар шаҳри Арлингтони иёлати Техас баргузор шуд, дар риштаи самбои размӣ дар вазни то 79 кило медали тилло ба даст овард.
Разавӣ Навбаҳоров 21 сол дошта, чанд соли охир дар якчанд мусобиқоти байнулмилалӣ оид ба самбо ва самбои размӣ ширкат карда, дар рақобатҳо миёни наврасону ҷавонон ва бузургсолон муваффақ гаштааст.
«Ӯ дар мусобиқаи байналмилалии самбо “Берлиниада — 2018” дар шаҳри Берлини Олмон дар рақобатҳо дар вазни то 62 кило бо медали тилло сарфароз гашта буд. Навбаҳоров соли 2018 дар Ҷоми ҷаҳонии самбо миёни донишҷӯён, ки дар шаҳри Нови-Сади Сербия доир гардид, дар вазни зери 57 кило бо медали нуқра мукофотонида шуд. Ӯ соли 2019 дар мусобиқаи қаҳрамонии самбои Осиё, ки дар пойтахти Муғулистон -Улан-Батор баргузор шуд, дар вазни то 70 кило байни наврасон медали нуқра ба даст овард. Инчунин ҳамон сол вай дар мусобиқаи байналмилалии самбо миёни наврасон ба хотираи Алекс Неруш дар шаҳри Ришон-ле-Cиони Исроил дар вазни зери 68 кило ба рақибонаш аз Латвия, Исроил ва Олмон ғолиб омада, соҳиби медали тилло гардид.»-менависад Радиои Озодӣ.
