Мақсуд Додоҷонови 22-сола дар театри “Чудес”-и шаҳри Маскав фаъолият дошта, ҳоло бо сафари ҳунарӣ вориди Тоҷикистон шудааст.
Мақсуд литсейи №2-и шаҳри Душанбе барои хонандагони болаёқатро хатм кардаааст.
Ӯ дар сеҳргарӣ маҳорати хос дошта, ба ҷуз ин, варзишгар аст ва ҳоло донишҷӯи риштаи ҳуқуқи Донишгоҳи ҳуқуқшиносии шаҳри Маскав мебошад.
Ба нақли вай, дар 5-6-солагиаш ба тамошои сеҳргарони чинӣ мерафт ва ба ҳар амали онҳо таваҷҷуҳ мекард. Падараш низ сеҳргар буда ба писараш ин пешаро омӯзонидааст. Инак, 3-4 сол мешавад, ки Мақсуд “фокусник”-и касбӣ аст.
“Барои омӯхтани “фокус” бояд пеш аз ҳама хоҳиш дошт. Чун ман аз хурдӣ шавқу рағбати ниҳоят зиёд доштам, ба мақсадам расидам.”, — мегӯяд Мақсуд.
Сеҳр навъи зиёде дошта, ки қисмеро дар кӯча бо корт ва ҳар гуна “кубик”-ҳо иҷро мекунанд. Сеҳрҳои бузург дар саҳнаҳо барои шумори зиёди одамон намоиш дода мешавад.
Мақсуд мегӯяд, аз анвои зиёди сеҳрҳо огоҳ буда то андозае онҳоро анҷом медиҳад.
“Ҳар сеҳри навро метавон дар муддати як моҳ омӯхт, қисме аз ин ҳам вақти бештарро мехоҳад. Онҳоро зиёд бояд такрор карду баъд ба мардум нишон дод.”, — қайд менамояд ӯ.
Ба бовар Мақсуд, сеҳр ба мардум дилхушӣ мебахшад. Ҳоло ӯ дар кишвар бо ҳайати театр дар сафоратхонаҳо, ташкилотҳои байналмилалӣ, мактабҳои хусусӣ, литсейҳо ва гимназияҳои шаҳр ва берун аз он “фокус”-ҳои худро нишон медиҳад.
Мақсуд ба ин андеша ҳаст, ки дилхоҳ корро барои пул кардан лозим нест. Агар таваҷҷуҳ барои корҳои муҳимтар бошад, пул худаш меояд.
Мақсуд дар оянда комилан ба сеҳргарӣ машғул шуданист, вале доштани маълумоти олиро низ муҳим арзёбӣ мекунад. Бинобар ин, дар риштаи ҳуқуқшиносӣ таҳсил дорад.
Ният дорад, ки солҳои наздик маҳораташро ба Президенти Тоҷикистон нишон диҳад.
Ҳ. Тоҳирӣ
