Устувории молиявӣ ва рушди созмонҳои ҷамъиятӣ дар як ҳамоише мавриди баррасӣ қарор мегирад.
Рӯзи 10 июни соли 2025 дар толори «Сомон»-и меҳмонхонаи Hilton (шаҳри Душанбе) конфронси «Устувории молиявии ташкилотҳои ҷамъиятӣ: ҳалли муосир ва дурнамои рушд» ба нақша гирифта шудааст.
Дар чорабинӣ намояндагони вазорату идораҳои дахлдор, шарикони рушд, созмонҳои байналмилалӣ, намояндагони ҷомеаи шаҳрвандӣ, соҳибкорони иҷтимоӣ, ассотсиатсияҳои тиҷоратӣ, бахши хусусӣ ва воситаҳои ахбори омма даъват гардидаанд.
Мақсад аз ҳамоиш муҳокимаи мушкилот ва имкониятҳои сармоягузорӣ ва устувории созмонҳои ҷамъиятӣ дар Тоҷикистон буда, ҳамчунин намунаҳои муваффақонаи ҳамкорӣ бо сохторҳои давлатӣ ва бахши хусусӣ муаррифӣ шуда, афзалиятҳои умумӣ барои ҳамкории минбаъда дар самти устувории молиявии ташкилотҳои ҷамъиятӣ мушаххас мегарданд.
Манучеҳра Маҷон, намояндаи Шӯрои миллии рушди назди Президенти ҶТ, Забирзода Некрӯй, сардори раёсати Кумитаи сармоягузорӣ ва идораи амволи давлатии назди Ҳукумати Тоҷикистон ва Ян Севера, директори АКТЕД дар Тоҷикистон ва Қирғизистон ширкат ва суханронӣ мекунанд.
Конфонс аз ду бахши асосӣ иборат буда, дар бахши аввал равандҳои сармоягузории хориҷӣ барои лоиҳаҳои созмонҳои ҷамъиятӣ дар Тоҷикистон — таҳлили вазъ ва таъсири кам шудани дастгирии донорҳо баррасӣ мегардад.
Бахши дуввум ба устувории молиявӣ ва сохтории ташкилотҳои ҷамъиятӣ — таҷрибаҳои маҳаллӣ ва ҷаҳонӣ, рушди соҳибкории иҷтимоӣ, масъулияти иҷтимоии ширкатҳо ва ҳамкорӣ бо бахши хусусӣ муҳокима хоҳад шуд.
Дастандаркорони конфронс барои мубодилаи таҷрибаҳо, муҳокимаи масъалаҳои калидӣ ва таҳкими ҳамкориҳо хоҳишмандонро ба ин ҳамоиш даъват менамоянд.
