Агарчи аз ҷониби санъаткорон намоҳангҳои зиёд нашр мешаванд, вале “мулт-клип” (намоҳанг дар формати 2D) то ҳол дар кишвар маъруф нест. “Мулт-клип” маҳсули эҷодиест, ки ҳама қаҳрамонҳои суруди рэп ё умуман саҳна бо расмҳои ҳаракаткунанда пешкаш мегардад.
Сомонҷон, яке аз аввалинҳост, ки ба таҳияи мулти-клип шурӯъ пардохтааст.
Сомонҷон Раҳмонзодаи 23-сола соли сеюм аст, ки “мулти-клип” месозад. Аввалин “мулт-клип”-аш ба яке аз рэпҳои Навик МС буд. То ин дам ӯ ба рэпҳои Навик МС ва “C.ONE” “мулт-клип” сохтааст. ва нозукиҳои ин корро давом 1 моҳ аз интернет омӯхт.
“Кори “мулт-клип”-созӣ бисёр душвор аст. Ҳарчанд, ин корро ман худам танҳо анҷом медиҳам, Ҳол онки кори чанд нафар аст. Яъне, як кас бояд сенария нависад, каси дигар расмҳоро тасвир кунад, нафари сеюм онҳоро ба ҳаракат дарорад ва чорумӣ тариқи барномаҳои танзим танзиму тадвин кунад… Дар кишвари мо ин намуди наворҳо маъруф нест ва овозхонҳо дархост намекунанд.”— мегӯяд Сомонҷон.
Сомонҷон донишҷӯи Донишгоҳи техникии Тоҷикистон аст. Ӯ мехост достонҳои “Шоҳнома”-и безаволи Фирдавсиро ба шакли “мулт-навор” омода кунад, вале аз сабаби набудани дастгирию сарпараст ин корро анҷом дода натавонист.
Ӯ мегӯяд, ки агар талабот ба кораш зиёд шавад, ният дорад тимеро сарҷамъ ва сохтани намоҳангҳоро маъмул намояд. Зеро, то ҳол аз сохтани “мулт-клип”-ҳо фоидаи моддӣ ба даст наовардааст.
Агар Сомонҷон дастгирӣ ёбад, дар сохтани “мулт-навор”-ҳо саҳми худро метавонад бештар гузорад. В-агарна бо ин кори заҳматталаб ва бесуд шӯълаи умедаш хомӯш мегардаду халос.
Ҳ. Тоҳирӣ
