Иҷрокунандагон ва ҳаводорони стендап-як жанри нави ҳаҷвӣ дар Тоҷикистон меафзояд. Ин навбат ҷавондухтареро пайдо намудем, ки тариқи стендапҳояш аз вазъи замон мегӯяд.
Заринахон Ҷумъабоеваи 22-сола бо вуҷуди ҷавон будан ба як жанри мураккаб– стендап рӯй овардааст.
Ӯ дар шаҳри Хуҷанд зиндагӣ мекунад. Кори асосиаш омӯзгорист ва ҳаҷвнигорӣ, аниқтараш стендаперӣ барояш хобби маҳсуб мешавад.
Заринахон Коллеҷи санъати шаҳри Хуҷандро бо дипломи аъло хатм карда, ҳоло дар ин даргоҳ фаъолияти омӯзгорӣ дорад ва ҳамзамон донишҷӯи Донишгоҳи давлатии Хуҷанд мебошад.
Пайвастани Заринахон ба ҳаҷв аз соли 2018, аниқтараш аз таъсиси лоиҳаи машҳури “Дугонаҳо” маншаъ мегирад. Ӯ аз ҳамон вақт қисми зиёди вақташро ба омӯхтан ва таҷриба гирифан дар ҳаҷв сарф карда, дар ҳоли ҳозир узви лоиҳаи ҳаҷвии “Территория юмора” мебошад.
Заринахон мегӯяд, бисёр дӯст медорад вақте бо шӯхиҳояш ба лабҳои одамон табассум меорад. Агарчи ин рисолати ҳаҷвнигор низ маҳсуб мешавад. Бар замми ин, мушкилоти замонро бо ҳаҷв ба мардум мерасонад.
Стендапери ҷавон мавзӯҳои стендапҳояшро аз зиндагии рӯзмарра пайдо мекунад. Барои рӯйи коғаз овардани баъзе аз онҳо соат ва баъзе аз он ҳафта вақт сарф менамояд.
Барои ба ҳаҷв машғул шуданаш волидон зид нестанд ва ҳамеша ӯро дастгирӣ мекунанд. Инчунин мардум ҳам аз стендапер будани як духтар гарм истиқбол менамоянд.
Заринахон ният дорад, ки дар Хуҷанд ва Душанбе консерти худро барпо кунад. Сипас дар хориҷи кишвар ин орзуҳояшро амалӣ карданист.
Ҳ. Тоҳирӣ
