Синои 15-сола дар Фестивали Ҷудо, ки рӯзҳои 23-24-и январ дар ноҳияи Емеляновская баргузор гардид, ширкат ва соҳиби медали тилло гардид.
«Иштироки аввалини ман дар мусобиқаи Федератсияи Русия буд, ки дар вазни 42кг сабқат кардам. Ҳарифонам аз минтақаҳои гуногуни Русия буданд ва ман 5 ҳарифамро мағлуб кардам. Дар даври ниҳоӣ бо варзишгар аз ноҳияи Уллан-Эде сабқат ва бо як усули начандон мушкил ба ӯ ғолиб омада, сазовори ҷойи аввал шудам.» — нақл мекунад Сино Бобохоҷаев.
Ин варзишгари наврас соли 2007 дар ноҳияи Рашт таввалуд шуда, аз хӯрдсолӣ ба варзиш рағбат дошт. Сино дар 10-солагӣ ба мактаби варзишии ноҳияи Рашт меравад ва зери назари устодаш Зоиршо Саймуҳиддинов кӯштӣ тамрин менамояд.
«Аз соли 2017 дар мусобиқаҳо ширкат мекардам. Дар ибтидо чандин бор мағлуб гардидам, вале ин ба рӯҳияи ман таъсир намерасонд, баръакс, зиёд кушиш мекардам, зиёд тамрин мекардам ва ба мусобиқоти навбати омодагӣ медидам. Дар минтақа ва ҷумҳурӣ дар бисёр мусобиқаҳои варзишӣ ширкат кардам. Дастовардҳоям низ зиёданд. То имрӯз наздики 30 медал ба даст овардаам, ки аз ин шумора беш аз 15 ададаш тилло, боқӣ ҷойи дуюм ва сеюм ҳастанд.», — нақл мекунад Сино.
Аз моҳи ноябри сипаришуда дар шаҳри Красноярски Федератсияи Русия дар толори варзишии ҳунарҳои размӣ зери назари Николай Геннадевич тамринро идома медиҳад.
Довуд Акобиров
