Раиси Ҷумҳурии Мардумии Чин Си Ҷинпин рӯзи якшанбе дар нишасти кишварҳои БРИКС дар Деҳлӣ изҳор дошт, ки Чин ташкили «минтақаи зеҳни сунъии дорои манбаи боз»-ро барои кишварҳои узви ин созмон роҳбарӣ хоҳад кард.
Ширкатҳои чинии фаъол дар соҳаи зеҳни сунъӣ чанде аз беҳтарин моделҳои зеҳни сунъии дорои манбаи кушодаро дар ҷаҳон таҳия мекунанд. Дар ин моделҳо рамзи манбаъ барои корбарон дастрас буда, онҳо метавонанд онро мутобиқи ниёзҳои худ тағйир диҳанд. Дар ҳамин ҳол, таҳиягарони амрикоӣ бештар ба истифодаи моделҳои пӯшида такя мекунанд.
Ин пешниҳод бахше аз ташаббуси раҳбари Чин таҳти унвони «Зеҳни сунъии боз ва фарогир» мебошад. Тибқи матни суханронии Си Ҷинпин, ки шабакаи давлатии телевизионии CCTV онро нашр кардааст, Чин омода аст «ҳамкорӣ дар таҳия ва истифодаи моделҳои бузурги забонӣ»-ро дастгирӣ кунад.
Ба гуфтаи Си Ҷинпин, ин ташаббус ҳамчунин таъсиси «барномаҳои махсуси таҳқиқотӣ ва омодасозии мутахассисон дар соҳаи зеҳни сунъӣ» барои кишварҳои БРИКС-ро дар бар мегирад. Ҳадаф аз ин иқдом «ташаккули экосистемаи боз ва фарогири зеҳни сунъӣ» мебошад.
БРИКС, ки Чин, Русия ва Ҳиндустон аз аъзои он мебошанд, соли 2009 ҳамчун як минбар барои иқтисодҳои бузурги рӯ ба рушд таъсис ёфта буд. Кишварҳои узв мехоҳанд дар ниҳодҳои байналмилалие, ки то кунун кишварҳои ғарбӣ дар онҳо нуфузи бештар доранд, нақши бештар дошта бошанд.
Си Ҷинпин ҳамчунин даъват кард, ки «низоми васеъ ва бар асоси ризоияти умумии танзими зеҳни сунъӣ дар сатҳи ҷаҳонӣ» таъсис дода шавад.
