Яке аз нигарониҳои роҳбарияти Кумитаи ҷавонон ва варзиш ин аст, ки духтарон баъди тамринҳо аз ширкат дар мусобиқаҳои варзишӣ даст мекашанд.
Абдулло Раҳмонзода, Раиси Кумитаи кор бо ҷавонон ва варзиши назди Ҳукумати ҶТ мегӯяд, теъдоди ҷавондухтароне, ки аз иштирок дар мусобиқаҳои варзишӣ даст мекашанд, хеле зиёд гаштааст. Ба таъкиди Абдулло Раҳмонзода, аз шумораи 102 ҳазор нафаре, ки дар мактабҳои варзишӣ ва толорҳо тамрин мекунанд, ҳамагӣ 14 357 нафари онҳоро занон ва бонувон ташкил медиҳанд.
“Ҳамасола, аз 2 то 4 фоиз рӯй овардани ҷавондухтарон ба варзиш афзоиш меёбад. Аммо аксарияти духтарон на танҳо пас аз оиладор шудан, балки баъди хатми мактаби миёна аз иштирок дар олимпиадаҳои варзишӣ даст мекашанд. Ман фикр мекунам, ки ин марбут ба мафкура ё ин ки ба “минталитет”-и мардуми мо аст.”,-зикр намуд раиси кумита зимни нишасти матбуотӣ.
Ба иттилои Абдулло Раҳмонзода, аксарияти духтароне, ки дар мактабҳои варзишӣ тамрин мекунанд то 13 – сола ҳастанд. “Шумораи духтарони болиғ нисбат ба духтарони ноболиғ ба маротиб камтар аст. Имрӯзҳо мо кушиш карда истодаем, ки барои ҷалби бештари занон барои иштирок дар чорабиниҳои оммавии варзишӣ корҳои муаянеро ба сомон расонем.”,-таъкид намуд Абдулло Раҳмонзода.
Хабарнигори тоҷик Мафтуна Шукурова, ки сабабу омилҳои даст кашидани бонувон аз варзишро таҳқиқ кардааст, мегӯяд, дар аксар ҳолат волидон сади роҳи ин духтарон мегарданд.
“Бештари духтарон дар мусоҳибаҳо ба мо гуфтанд, сабаби асосии тарки варзиш кардан, расидан ба синни балоғат ст. Зеро, ба гуфтаи онҳо, волидонашон мехоҳанд, пас аз хатми мактаби миёна духтаронашон зуд оиладор шаванд… Омилҳо хеле зиёд аст. Яке аз онҳо минталитети мардуми мо ҳаст…”,-мегӯяд Мафтуна Шукурова.
Фотима Гадоева 17 сол дошта, ба варзиши вазнин, яъне, гуштини ҷудо машғул аст. Ӯ 4 бор дар мусобиқаҳои Осиёи Марказӣ мақоми аввалро соҳиб гардидааст.
Фотима аз 6 — солагӣ ба ин навъи варзиш машғул аст. Ҳатто ҷавонписаронро ҳам дар гуштини ҷудо мағлуб мекунад. Акнун ки ба балоғат мерасад, волидонаш тасмим гирифтаанд, ки ӯро аз варзиш дур кунанд. Соли оянда Фотима 18 — сола мешавад. Аз ин рӯ, падару модараш мехоҳанд, вай аз варзиш даст кашида ба шавҳар барояд. Зеро, ба андешаи онҳо вазифаи ҳар як зане, ки ба камол мерасад шавҳар кардану ба тавлиду тарбияи фарзанд машғул шудан аст. Аммо новобаста аз тасмими онҳо устодаш Равшан Баҳодурзода аз ояндаи Фотима умеди зиёд дорад.
Варзишгарони собиқадор ва ё устодони варзиш низ аз бархурд ва монеа шудани волидон нисбати варзиши духтарон изҳори нигаронӣ мекунанд. Аз ҷумла қаҳрамони бозиҳои олимпӣ ва бонуи мушзани тоҷик Мавзуна Чориева бар он назар аст, ки занҳо бояд ҳамеша тамрин кунанд, зеро, агар зан ҷисман солим бошад, фарзанди солим ба дунё меорад. “Ҷомеаи мо то ҳол варзиши занонаро дар сатҳи зарурӣ қабул накардаанд. Варзишро занон ба хотири саломатӣ интихоб мекунанд. Ҷомеаро занон обод мекунанд. Чунки зани солим фарзанди солим ба дунё меорад. Аз ин рӯ, занон бояд тамрин кунанд.”,- таъкид менамояд Мавзуна Чориева.
Устоди варзиши байналмилалӣ Асомиддин Сангинов бар он назар аст, ки баъзе духтарон ба варзиш шавқ доранд, аммо волидони онҳо садди роҳашон мегарданд.
“Баъзе падару модароне ҳаст, ки худашон духтарҳояшонро ба варзиш ҷалб мекунанд. Боз ҳаст баъзан волидоне, ки намехоҳанд духтаронашон тамрин кунанд. Дар ҳамин толори варзишии мо духтароне, ки бо хоҳиши худашон барои тамрин омада буданд, падару модарашон омада онҳоро гирифта бурданд.”,-мегӯяд Асомиддин Сангинов.
Баҳруллои М.
Акси асосӣ аз sputnik-tj
