14 шарти Эрон ба Амрико

Хабаргузории эронии Меҳр,лоиҳаи ёддошти тафоҳум байни Эрон ва Амрикоро нашр кардааст. Ин санад аз 14 банд иборат буда, қатъи ҷанг, хуруҷи нерӯҳои амрикоӣ аз минтақа, бекор кардани таҳримҳо ва озодсозии дороиҳои Эронро дар баробари гузаштҳои ҳастаии Теҳрон пешбинӣ мекунад.

Тибқи матни нашршуда, ёддошт нуктаҳои зеринро дар бар мегирад:

• қатъи комил ва фаврии ҷанг дар ҳамаи ҷабҳаҳо, аз ҷумла дар Лубнон;
• уҳдадории ИМА ба принсипи дахолат накардан ба корҳои дохилии Эрон ва эҳтиром ба соҳибихтиёрии кишвар;
• бекор кардани муҳосираи баҳрӣ дар давоми 30 рӯз;
• азсаргирии фаъолияти Тангаи Ҳурмуз дар давоми 30 рӯз бо дарназардошти мувофиқаҳо бо Эрон;
• уҳдадории ИМА барои берун бурдани нерӯҳои худ аз минтақаҳои ҳаммарз бо Эрон;
• боздоштани таҳримҳо нисбат ба фурӯши нафт, маҳсулоти нафту кимиё ва дастрасии пурраи Эрон ба захираҳои молиявии худ;
• пешниҳоди нақшаи барқарорсозии Эрон аз ҷониби ИМА ва муттаҳидонаш ба маблағи на камтар аз 300 миллиард доллар;
• оғози музокирот дар давоми 60 рӯз барои расидан ба созишномаи ниҳоӣ оид ба масъалаҳои ҳастаӣ ва лағви пурраи таҳримҳо, инчунин қатъномаҳои Шӯрои Амнияти Созмони Милали Муттаҳид ва Оҷонсии Байналмилалии Энергияи Атомӣ;
• тасдиқи пойбандии Эрон ба Аҳднома дар бораи паҳн накардани силоҳи ҳастаӣ ва даст кашидан аз истеҳсоли силоҳи ҳастаӣ;
• уҳдадории ИМА барои зиёд накардани шумораи нерӯҳои худ дар минтақа ва ҷорӣ накардани таҳримҳои нав дар ҷараёни музокирот;
• озодсозии 24 миллиард доллар дороиҳои Эрон дар давоми 60 рӯзи музокироти ниҳоӣ, ки нисфи он бояд пеш аз оғози музокирот ба ихтиёри Эрон гузошта шавад;
• таъсиси механизми назорат барои иҷрои созишнома;
• тасдиқи созишномаи ниҳоӣ тавассути қатъномаи Шӯрои Амнияти СММ;
• оғоз нашудани музокироти ниҳоӣ то замони озодсозии нисфи дороиҳои Эрон, боздоштани таҳримҳои нафтӣ ва бекор кардани муҳосираи баҳрӣ.

Дар ин санад баррасии барномаи мушакии Эрон ва дастгирии гурӯҳҳои муқовимат аз рӯзномаи музокирот хориҷ карда шудааст.

Вазорати корҳои хориҷии Эрон изҳор доштааст, ки матни мазкур ҳоло танҳо хусусияти аввалия дошта, ниёз ба баррасӣ ва такмили минбаъда аз ҷониби ниҳодҳои дахлдори кишвар дорад.