Дар Душанбе натиҷаҳои Шарҳи чоруми натиҷанокии фаъолияти экологӣ дар Тоҷикистон муаррифӣ шуда, барои татбиқи тавсияҳои он дар солҳои 2027–2029 таҳияи Харитаи роҳ оғоз гардид.
Ин ҳуҷҷат бояд ба як саволи муҳим ҷавоб диҳад: тавсияҳои экологӣ чӣ гуна ба корҳои мушаххас табдил меёбанд?
Дар чорабинӣ намояндагони Ҳукумати Тоҷикистон, вазорату идораҳо, СММ, Комиссияи иқтисодии СММ барои Аврупо, шарикони рушд ва коршиносони байналмилалӣ иштирок карданд.
Шарҳи чаҳорум кадом масъалаҳоро фаро мегирад?
▫️ тағйирёбии иқлим ва ҳифзи пиряхҳо;
▫️ сифати ҳаво ва захираҳои об;
▫️ партовҳо ва моддаҳои кимиёвӣ;
▫️ гуногунии биологӣ ва ҳифзи экосистемаҳо;
▫️ ҳифзи замин ва хок;
▫️ маблағгузории ҳифзи муҳити зист;
▫️ қонунгузорӣ ва идоракунии экологӣ;
▫️ таъсири саноат, энергетика, кишоварзӣ, нақлиёт ва тандурустӣ ба муҳити зист.
Қадами баъдӣ — Харитаи роҳ барои солҳои 2027–2029.
Тибқи нақша, барои ҳар як тавсия бояд мақоми масъул, муҳлати иҷро, натиҷаи интизоршаванда, нишондиҳандаҳои мониторинг ва манбаи эҳтимолии маблағгузорӣ муайян карда шавад.
Дар чорабинӣ ҳамчунин гуфта шуд, ки лоиҳаи Кодекси экологии Тоҷикистон таҳия шуда, барои баррасӣ ба вазорату идораҳои дахлдор пешниҳод гардидааст.
Дар баробари ин, корҳо барои рақамикунонии соҳаи ҳифзи муҳити зист, беҳтар кардани мониторинги экологӣ, ҳифзи гуногунии биологӣ ва пиряхҳо идома доранд.
Ҳадафи ниҳоӣ — идоракунии беҳтари муҳити зист, рушди иқтисоди сабз, мутобиқшавӣ ба тағйирёбии иқлим ва беҳтар шудани шароити зиндагии аҳолӣ.
