Роҳбари ширкати Meta Марк Сукерберг номаи бозеро дар бораи рушди зеҳни сунъӣ нашр кард. Дар он ӯ зидди тамаркузи системаҳои пуриқтидори зеҳни сунъӣ дар ихтиёри шумораи ками ширкатҳо ё сохторҳои давлатӣ сухан гуфта, таъкид кардааст, ки вазифаи асосии солҳои наздик дастрас кардани суперзеҳнҳо ба ҳар як инсон мебошад.
Ба гуфтаи Сукерберг, зеҳни сунъӣ бояд воситаи эҷоди донишҳои нав, технологияҳо ва соҳибкорӣ бошад, на танҳо абзори худкорсозии равандҳои мавҷуда. Ӯ бар ин назар аст, ки суперзеҳни инфиродӣ метавонад ба одамон дар таҳияи доруҳои нав, таъсиси ширкатҳои шахсӣ, азхудкунии босуръати малакаҳои нав ва ҳалли самараноки масъалаҳои рӯзмарра кумак кунад. Ба андешаи ӯ, саҳми асосии зеҳни сунъӣ дар рушди ҷомеа ихтироъкорӣ хоҳад буд, на иваз кардани меҳнати инсон.
Сукерберг ҳамчунин идеяи назорати мутамаркази суперзеҳнро танқид кард. Ба гуфтаи ӯ, агар чунин технологияҳо танҳо дар ихтиёри шумораи маҳдуди созмонҳо бошанд, ин метавонад ба таъсири аз ҳад зиёд ба иқтисод, илм ва сиёсат оварда расонад. Ба ҷои ин, ӯ пешниҳод мекунад, ки ҳар як инсон ёвари шахсии худро дар асоси зеҳни сунъӣ дошта бошад.
Барои шарҳи андешаи худ ӯ чунин мисол меорад:
«Тасаввур кунед, ки танҳо як нафар ҳуқуқшиноси дорои суперзеҳн дорад. Ӯ ҳатто дар ҳолате, ки ҳақ нест, дар додгоҳ бартарии ноодилона пайдо мекунад. Ин ба ҷомеа зарар мерасонад. Аммо агар ҳар кас чунин ҳуқуқшиноси суперзеҳн дошта бошад, адолати судӣ нисбат ба имрӯз хеле одилона ва самараноктар мегардад. Вақте одамон дорои имкониятҳои баробар мешаванд, онҳо метавонанд ҳамдигар ва инчунин нуфузи ниҳодҳои бузургро ба таври табиӣ дар тавозун нигоҳ доранд.»
Сукерберг мутмаин аст, ки паҳншавии васеи суперзеҳн бозори меҳнатро аз байн намебарад, балки имкониятҳои нав фароҳам меорад. Ба пешгӯии ӯ, таъсиси тиҷорати шахсӣ осонтар шуда, иқтисод бештар ба соҳибкорӣ такя мекунад ва шумораи ширкатҳои хурд афзоиш меёбад.
Дар ширкати Meta бар ин назаранд, ки рушди зеҳни сунъӣ бояд ба принсипҳои озодӣ, таҳқиқоти кушода, соҳибкорӣ ва дастрасии баробар ба технологияҳои нав асос ёбад.
Ҷолиб он аст, ки Илон Маск низ пайванди ин номаи кушодаи Марк Зукербергро дар саҳифаи худ нашр кардааст.
