Агентии «Тоҷикстандарт» аз фурӯшандагон ва соҳибкорон талаб кардааст, ки ба кӯдакону наврасон нӯшокиҳои нерӯбахш (энергетик) нафурӯшанд. Зеро, чунин маҳсулот танҳо ба шахсони аз 18-сола боло фурӯхта мешавад.
Ба иттилои ин ниҳод, солҳои охир истифодаи нӯшокиҳои нерӯбахш миёни ҷавонон ва наврасон хеле маъмул шудааст. Онҳоро барои рафъи хастагӣ, боло бурдани нерӯ ва болидаруҳӣ истифода мебаранд.
Ҳамзамон, Агентӣ аз натиҷаи як санҷиши ғайринақшавӣ дар ҶДММ «Арк саноат» — истеҳсолкунандаи нӯшокиҳои «PANTERA» хабар додааст, ки дар раванди истеҳсол оддитарин қоидаҳои санитарӣ ва талаботи ҳуҷҷатҳои меъёрии техникӣ риоя намешудаанд.
Илова бар ин, маълум гардидааст, ки истеҳсоли маҳсулоти ҳалол ва нӯшокиҳои алкоголӣ дар як раванди технологӣ ба роҳ монда шудааст. Бо ин сабаб, тамғаи «Ҳалол», ки ба нӯшокиҳои «PANTERA» дода шуда буд, бекор гардидааст.
Аз агентии мазкур ба Ховар хабар додаанд, ки риоя накардани талаботи меъёрӣ метавонад ба истеҳсоли маҳсулоти бесифат оварда расонад. Ҳамчунин таъкид шудааст, ки ҳатто мавҷуд будани тамғаи «Ҳалол» маънои онро надорад, ки нӯшокиҳои руҳафзо барои кӯдакону наврасон бехатар бошанд.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
