Саидзода Раҳим Ҳамро, вазири маориф ва илми Тоҷикистон зимни нишасти матбуотӣ таъкид кард, ки обунаи муаллимон ба нашрияҳои ғайрисоҳавӣ қатъиян манъ буда, ҳатто барои пешгирӣ аз чунин ҳолатҳо мактуби дастурӣ бо имзои Роҳбари дастгоҳи иҷроияи Президенти Тоҷикистон ба мақомотҳои иҷроияи ҳокимияти давлатӣ ва Раёсатҳои маорифи шаҳру ноҳияҳо фиристода шудааст.
Ин дар ҳолест, ки Ҳамчунин қонун “Дар бораи мақоми омӯзгор” “аз музди меҳнати омӯзгор гирифтани маблағ барои обунаи нашрияҳои ғайрисоҳавӣ, корҳои ободонӣ, чорабиниҳои фарҳангӣ, харидани маводи таълимӣ, методӣ, аёниятҳо, воситаҳои техникӣ ва лавозимоти дигари таълимӣ»-ро манъ намудааст.
Қонун «Дар бораи мақоми омӯзгор», ки ахиран қабул ва мавриди амал қарор гирифт, бо ҳадафи баланд бардоштани нуфузи иҷтимоии омӯзгор, ҳифзи ҳуқуқу манфиатҳои касбии ӯ ва фароҳам овардани шароити мусоиди фаъолият қабул шуд. Қонун ҳуқуқ, уҳдадорӣ ва масъулияти омӯзгоронро муайян намуда, кафолатҳои давлатии ҳифзи иҷтимоӣ, амнияти меҳнатӣ ва рушди касбиро пешбинӣ мекунад.
Тибқи қонун, омӯзгор шахси калидӣ дар низоми маориф эътироф шуда, дахолати ғайриқонунӣ ба фаъолияти касбии ӯ манъ аст. Ҳамзамон, давлат ӯҳдадор мешавад, ки барои такмили ихтисос, қадрдонӣ аз заҳмати омӯзгорон ва беҳтар кардани шароити моддиву иҷтимоии онҳо тадбирҳои зарурӣ андешад.
