Дорои 400 сарватманди Амрико ба 6,6 триллион доллар расид. Танҳо дар 12 моҳи охир онҳо 1,2 триллион доллар ба даст овардаанд.
Соли ҷаҳорум аст, ки дар садри ин рӯйхат бунёдгузори Tesla ва SpaceX Илон Маск қарор дорад ва дороии ӯ ба 428 миллиард доллар расидааст. Маск аввалин шахсест, ки сарваташ аз 400 миллиард доллар гузашт. Дороии Маск нисбат ба соли гузашта 184 миллиард доллар афзудааст.
Дар ҷойи дуюм ҳаммуассис ва раиси Шӯрои директорони ширкати технологияи Oracle Ларри Эллисон қарор дорад, ки дороияш 276 миллиард доллар ҳисоб шудааст. Нафари сеюм роҳбари ширкати Meta Марк Сукерберг бо сарвати 253 миллиард доллар қарор дорад.
Бар асоси рейтинг, барои шомил шудан ба рӯйхат ҳоло зарур аст, ки шахс ҳадди ақал 3,8 миллиард доллар дороӣ дошта бошад. Ин нишондиҳанда нисбат ба соли 2024 500 миллион доллар зиёдтар аст.
Дар зинаи чорум бунёдгузори Amazon Ҷефф Безос бо 241 миллиард доллар ва дар зинаи панҷум ҳаммуассиси Google Ларри Пейҷ бо 179 миллиард доллар қарор гирифтаанд.
Сарватмандтарин зани ИМА вориси шабакаи Walmart — Элис Уолтон бо дороии 106 миллиард доллар шинохта шудааст.
