То чанд соли пеш мо танҳо дар мактаб ва аз дарсҳои иловагӣ забонҳои хориҷиро меомӯхтем. Ҳоло ҳар нафар имкон дорад дар марказҳои забономӯзӣ ва ҳатто аз хона берун нашуда дилхоҳ забонро дар вақти барояш муносиб омӯзад.
Ин раванд дар Тоҷикистон низ маъмул мегардад ва кори Олимҷону Таҳмина тариқи интернет омӯзонидани як забони хориҷӣ аст.
Олимҷон Ҷураев ва ҳамсараш Таҳмина Саидова омӯзгорӣ мекунанд. Олимҷон Донишгоҳи Миллии Тоҷикистон ва Таҳмина Донишгоҳи славяниро хатм намудааст. Ҳар ду аз рӯйи ихтисос забоншинос – тарҷумони забони англисӣ буда, зиёда аз 5 сол мешавад, ки ба мардум забони англисӣ меомӯзанд.
Олимҷон аз даврони кӯдакӣ мусиқии Амрикоро гӯш медод, бозиҳои компютерӣ, филмҳо, китобҳои бадеӣ, комиксҳои англисиро гирдоварӣ мекард. Вале Таҳмина ибтидо духтур шудан мехост, лекин падараш розӣ набуд. Бинобар ин, Таҳмина ба омӯзиши забони англисӣ пардохт…
“Ибтидо дар як маркази забономӯзӣ фаъолият мекардем, вале тасмим гирифтем, ки тариқи “онлайн” дарс диҳем. Ҳоло аз Амрикову Аврупо ва Русия шогирдони зиёд дорем.”,-мегӯяд Олимҷон.
Ҳамчунин дар “Instagram” саҳифаеро бо номи “JSENG” боз кардаанд, ки беш аз 40 ҳазор обуначӣ онро пайгирӣ мекунад.
“Мо замони карантин оиладор шудем. Он вақт ба ин натиҷа расидем, ки донишҳои хешро ба наврасону ҷавонон қисмат намоем. Ҳамин тавр, чандин наворҳои омӯзишӣ дар “YouTube” нашр кардем ва сипас ба “Instagram” рӯй оварда, саҳифаамонро дар ин шабака JSENG номгузорӣ кардем. Маҳфуми “JSENG” акроним буда ҳарфи аввал “J” – Juraev (насаби Олимҷон), “S” – Saidova (насаби ман) ва “ENG”- English –англисӣ аст.», — афзуд Таҳмина.
Ҳоло дар “Instagram” наворҳои кӯтоҳ нашр мекунанд ва дар ҳар навор калима, ибора ва ё ҷумлаи англисӣ меомӯзонанд.
Ин оилаи ҷавон мегӯяд, аз наворҳои “Instagram” наметавон забонро пурра омӯхт, вале ҳамчун дониши иловагӣ истифода кард.
Ҳафизуллоҳ Тоҳирӣ
